ЦIийи имуча-мучаяр

1.
Имуча-муча, муч халича:
Яман туьнт итим я ам,
И гафар туш тапарар.
Вич хъфейлани кIвализ
Къецел амукьда япар.

2.
Имуча-муча, муч халича:
Яргъарилай элкъведа,
Гардан кIирна къекъведа.
Хелвет суьруьда гьатда,
ЯхцIур мурдарна гатда.

3.
Имуча-муча, муч халича:
И гьайван ягъийрикай,
Вичин рапари хуьда.
Ам кIватI хьана са кIентI хьиз,
Багъ-бустанда ксуда.
И цацарин къеневай
Як дарман я лугьуда.

4.
Имуча-муча, муч халича:
Садани ам тек недач!
Квачирдахъ тIям жедач!

5.
Имуча-муча, муч халича:
ЯхцIур кьатI либас алай
Са руш ава тахтуна.
Чамра адаллай пекер
Сад-сад вири хтунна.
Ибур гьихьтин либасар,
Я рапинин цвaл алач,
Яни са дуьгме галач?
6.
Имуча-муча, муч халича:
К1валин юкьвал алайди,
Я кьил авач, я гъилер
Тек кьуд кIвач я авайди.

7.
Имуча-муча, муч халича:
Ам цIалцIам никIе гъилив
Жерге-жерге цада за.
Ахпа мецевни гъилив
ЦIар-цIар, сад-сад неда за.

8.
Имуча-муча, муч халича:
Явашдаказ атана
Гьахьна са мичIи тIуна.
Адаз ни вуч лагьана,
Фена кIвал кьамал кьуна?

9.
Имуча-муча, муч халича:
Лагь, им вуч затI я,
Лацу цIегьери
Ч1улав нек гана?

10.
Имуча-муча, муч халича:
Валлагь таб туш и гафар,
Гьамиша къене кьуьд я,
Къецел хьайитIан(и) гатфар.

11.
Имуча-муча, муч халича:
Чин чIулав хьайитIани,
Вич хъуьтуьл ва цIалцIам я.
На лугьумир, адан тIвар,
«Тум» вилик галай хам я.
12.
Имуча-муча, муч халича:
Са сандухда къатканва
Кьилер Къибледихъ суьруь.
Ажайиб кар я, абур
ЧIугунвай жеда куьруь.
Суьруьда кьарар къад я,
Амукьдайди са кьатI я!

13.
Имуча-муча, муч халича:
Ал яру пекер алай
Рушар ава никIера.
Вучиз чIулав рехнеяр
Ара абрун хъуьхъерал?

14.
Имуча-муча, муч халича:
Иви квай яру тан
ЧIехи жеда накьвада.
Вичиз хабар аватIа,
Чуру ава гьавада?!

15.
Имуча-муча, муч халича
За накьвадик тум цана,
ЭкъечIайди пеш хьана.
Кьуьзуь, жегьил галкIана,
Пешер гумадиз гана.

16.
Имуча-муча, муч халича:
Цил цана тарцин кIана,
ЭкъечIдайла дамахна.
ЧIехи жердивай тарциз
Аруш жез-жез акьахна.

ТуькIуьрайди: Жалал БАГЪИРАШТУЛ

Жавабар:
1. Хенжел. 2. Жанавур. 3. Кьуьгъуьр. 4. Кьел. 5. Келем. 6.Стол. 7.Чарчел кхьинар. 8. Хъалхъас къиб(кьвал алай къиб). 9. Дошаб. 10. Холоделник. 11. Тумаж. 12. Сигарет. 13. Бубуяр. 14.Чугъундур. 15.Тенбек. 16. Пахла.

 

Добавить комментарий

Ваш адрес email не будет опубликован. Обязательные поля помечены *