Са легьзеда кьил акъатнач вуч ятIа,
Лайла туштIа, вучиз икьван хуш ятIа?!
Лугьузвайди инсан ятIа, гъуц ятIа?!
Гафун рикIяй ванцин рикIиз рехъ я вун,
Лагь Фаризат, чи манида экв я вун.

Агъзур суьгьуьр са аваздай хъуьреда,
Ялда ванци аламатдин жуьреда,
Уьмуьрна за, ваз яб гайи береда.
Гафун рикIяй ванцин рикIиз рехъ я вун,
Лагь Фаризат, чи манида экв я вун.

Ви макьамри лезет гана, дад гана,
Ванцин хура, гьиссерин шагь мат хьана.
Шаир Эйваз, тIал амачиз шад хьана
Гафун рикIяй ванцин рикIиз рехъ я вун,
Лагь Фаризат, чи манида экв я вун.

ЭЙВАЗ