Фейи йисуз «АЛАМ» журналди “Самур” културадин меркездин куьмекдалди Бакуда Жегьил Тамашдайбурун Театрда «Шагьдагъ» ВИА-дин 30 йисан юбилей кьиле тухвана. Мярекатда сифте гаф, чи рехи кас, академик, Азербайжан Гьакуматдин лап чIехи «Шуьгьрет» ордендин иеси, чаз хъсан чидай Асеф Мегьманан стха Камал Абдуллаева лагьана. Ансамбл, атанвайбур барка авуна, вичин чIехивилин меслятар гана.
«Шагьдагъ» ансамбл 1984 -йисуз жегьил компазитор Видади Зуьлфуькъарова КцIар райондин ГуьндуьзкIеле хуьруьн клубда туькIуьрнай. 30 йисан къене ансамблдин суракь чи сегьнейрай, мел-мехъерикай атана, чи музыкадиз са шумуд мани пахшна, 1987- йисуз Вирисоюздин, 1988-йисуз «Дуствал», 1991-йисуз “Шарвили” фестивалрин лауреат хьана, «халкьдин коллектив» тIвар къачуна, къени сегьнеда ама.
Межлисда чи сейли инсанри режиссор, Азербайжандин халкьдин артист, «Шуьгьрет» ордендин сагьиб, профессор, эсли Дагъустандин Ахцегь райондай тир Женнет Салимовади, Азербайжандин Милли Межлисдин депутат Азер Бадамова, Азербайжан-Дагъустан Дуствилин Жемийятдин президент Абдулкъафар Ахмедова, шаир Сеидмет Самуриди, Азербайжанда кьве Азербайжандин Пайдах ордендин сагьиб тир полковник Шаир Рамалданова ансамблдиз, атанвайбуруз чпин мурадар чирна, ихьтин межлисрин хийирдикай рахана. Мярекатда чи гзаф манидарри манияр лагьана. Решид Хидиров, Явер Шалбузов, Элман Амирханов, Магьира Ширинова, Финяз Гьажиметов, Дагъустандин Лайих артист Фаризат Зейналова, Руслан Пирвердиев, Сархан Шагьдагъви, Бехтияр Саидов, Адил Сафаров, Азербайжандинни Дагъустандин Лайихлу артист, Ширбет Рзакъулиев атанвайбуру хушдаказ кьабулна, зурба алхишрив, цуькверив рекье туна. Межлисдин лап иер легьзе цIуд яшда авай са лезги аялдин- Исмаил Саидован рахунар хьана. Бакуда чIехи жезвай аялдин сифте гаф, вичин дидедиз разивал хьана:-«Чан диде, ви чан сагърай заз лезги чIал, фолклор, кIел-кхьин чирай.» Ахпа ада Билал Адилован «Дидедин чIал» шиир лагьана.
Юбилей чи «Левитан», Бакудин Гьакуматдин Радиодин Лезги гунугрин редактор Руслан Шейдаева, Къуба Педагогикадин Институтдин студентка Лезгина Зуьлфуькъаровади пара устадвилелди кьиле тухвана. ГьакIни, концертдиз чи иер зари Билал Адиловани, сейли журналист Камран Къурбаналийрина кхьенвай сценаридин бегьемвили, гьакIни чи кани, чIехи камалэгьли Асеф Мегьманан мубаракдин гафари, Завир Наджафован «Лезгинка» ансамблдин кьуьлери мадни хъсан ранг гана.
Межлисдин эхирда журналдин кьилин редактор Камран муаллимди виридаз вичин разивал, хвешивал малумарна, чи музыка вилик тхунин карда авай къуллугъриз килигна «Шагьдагъ» ансамблдин регьбер Видади Зуьлфикъароваз, Ширбет Рзакъулиеваз, Фаризат Зейналовадиз, Элман Амирхановаз «АЛАМ» журналдин «Лезги културадин дамах» дипломар, машгьур чIугвар Дарвин Велибегован эсерар пахшна.
Лезгина