18-майдиз Дербент шегьерда чIехи СтIал Сулейманаз гуьмбет ахъаюнин мярекат кьиле фена. Гуьмбетдин автор Урусатдин Халкьдин художник, скулптор Гьейбат Гьейбатов я. Халкьдиз и иер гуьмбет пешкеш авур Дербент шегьердин кьил И.Яралиева, РД-дин Халкьдин Собранидин Председателдин заместител Сейфулла Исакьова, Нариман Абдулмуталиба, Кичибег Мусаева, шаирдин хтул Лидия СтIалскаяди, Сажиддин Саидгьасанова ва масадбуру шаирдин уьмуьрдикай, и иер мярекатдикай эхтилатна.
И чIехи межлисда «МАРВАР» кIватIалдин кьил Гуьлалийрин Эйвазазни гаф гана:

Чун мад сефер агатна,
Къенин ризкьи шиир хьуй.
И эквуьнал атанвай атанвай
Квез и чIаван хийир хьуй.

Играми чан жуванбур, ярар –дустар! Квез и чIаван хийирар хьурай. За квез, Бакуда акъатзавай «АЛАМ» лезги културадин журналдин, адан хел тир «МАРВАР» литературадин межлисдин тIварцелай къенин сувар барка ийизва. Квез сувар мубарак хьурай!

Къушран мецив, таму лагьай маниди,
Зи нугъатдин хуш аваздив ванда заз.
Юкъуз цавуз дадзавайбур пара я,
МичIи йифиз, са секин пIипI канда заз.

Заз секин пIипI а виляй канда хьи, секин береда зун рикI сад тир, рехъ сад тир, руьгь сад тир дустарихъ галаз рахада. Абур зи шиирриз сифте яб гузвайбур, къимет гузвайбур, меслят гузвайбур я. А инсанрикай садни къе чун эквуьнал кIватI хьанвай Сулейман буба я. И кас гафунин шагь гьайивиляй рикIерин шагь хьана. Зи рикIинвиди заз, зегьметдив кIеви хьанвай, лигим хьанвай тIуб винизна шиир лугьуда:-

Ви гъиле серф гьатай бере,
Лаш эцягъа адан хире.
Пуд виш йисан ктIай вире
Хъвадай ширин яд жедай туш.

Гьа и жуьре заз тек шиир кхьиз ваъ, гьакIни лугьуз чирна. Фагьумдин кукIуш тир чIехи шаирди заз лугьуда:-«Чан хва, шиир чарчелай кIелин гунагь я.»

Къайил хьун хъсан я жегьил береда,
Садра пагь атIайди четин хъуьреда,
ЧIух хьайи шаирдиз Керем жуьреда,
Дарман жагъаначтIа шел герек авач.

Гафунин верцIивал къурбан тирдан сир,
Тух жедач уьмуьрдай атайтIан эхир.
Чан алаз гафунин хьаначтIа къадир
Шаир къуьнел кьадай эл герек авач.
Вилик ква алемдин рикI лугьур ктаб,
ЖагъайтIа атIутI рехъ, зи байихра таб.
Арада элкъвейра хьанватIа татаб
Зун завай къакъуддай сел герек авач.

Заз течиз и жуьре кIвалах хьанава,
Дуьньядиз тапарар алах хьанава.
Эйваз Сулейманан чIалахъ хьанава
Некедик галачтIа кьел герек авач.

Эхь, Сулейманал чIалахъ тахьун мумкин тучир кар я. Вучиз лагьайтIа С. Сулеймана чи чIал, чи поэзия цIилцIелай ваъ, пуналай акъатнавайди дуьнядиз раижна. КIел-кхьин чин тийиз акьван шиирар, поэмаяр теснифин, сятаралди хуралай лугьун шаирдин фагьумдин чIехивал хьиз, чIалан иервал, сурвални я. Дувул кIеви тучир чIалавай, халкьдивай икьван зурба шаир арадал гъиз жедач.
Куьн вири саламат хьурай, и къадим Дербент шегьерда датIана суварар хьурай.

“АЛАМ”