Шаир диде Мислиматавай пай къачунвай руша мектебда кIелзамаз шиирар кхьиз кьил ктунай. Ада тIебиатдикай, муьгьуьббатдикай, уьмуьрдикай кхьенвай шиирар, рубаияр кIелзавайбуру хушдаказ кьабулзава
Заридин рикI алай жанр рубаияр, дерин фикир квай кьуд цIарцIин шиирар, я. Саиратан рубаияр «Куьредин ярар» кIватIалда гьатнава, «Рубаияр» тIвар алай улубни акъатнава.
С. Агьмедпашаевади Каспийск шегьерда уьмуьрзава.
“МАРВАР”
Гьуьлуьн чиркер михьда кьакьан лепеди,
Руквар, кьалар цIурурда къваз живеди…
Намусдал ви мукъаятвал тахьайтIа,
КьацIурда вун кткай стIал лекеди!
***
Пис гаф лугьуз, на кьулухъди элкъуьриз,
Япун перде жедач цIийиз туькIуьриз…
Уьмуьр кIватI я краринни чIаларин –
Ягъалмиш хьухь, рикIерик экв куькIуьриз.
***
Са таб квачиз рахай инсан къалур заз,
Нефсинин кIвал ацIай инсан къалур заз.
Эхиратда чахъ суд авач лугьурбур,
А хабар гваз хтай инсан къалур заз.
***
Кас авай туш ви вилик пад кьаз жедай,
Эй уьмуьр, вун са хупI яд я, хъваз жедай.
Тади ийин, дуьньядин нур хчIализ,
Къведалди вахт, ам къах хьана къваз жедай!
***
Дуьня, види залум кьисас кьун я жал!?
Бязи рикIер ви есирда тун я жал!?
Я тахьайтIа, сад Керем, сад Эсли хьиз,
ЦIал вегьена, кьведни санал кун я жал!?
***
Им дуьнья я, вичик умуд кутаз тежедай,
ЧкIайтIани, мад кIалубда хутаз тежедай.
Ша, къецин югъ безетмишин гьунаррив жуван,
Уьмуьр — ганвай легьзе я чаз, мад кьаз тежедай…
***
Эй, фугъара, дерт кIевириз алахъзава вун,
Циф хьиз, чкIиз, рикIелай ви алахьзава гум.
«Уьмуьрдин рагъ», вун, муркIадин къаябдиз элкъвей,
Гатфарни гад хъфейла, куьз авагъзава вун?
***
ГалачтIани жуван кьулухъ са чIехи арха,
Рехъ гудай туш за далудлай, зун я зи кавха.
Дагъви я зун, дамарра зи къекъвезва вацIар,
Ватан патал герек чIавуз чанни гуда за.
***
Хъсан тир, чаз дуьньядикай регъуь жедайтIа,
Намуссузбур хъуьтIе гьатна, рехи жедайтIа…
Дуьня хуьзвай паклубурун уьмуьрдин рекьер,
Гатун къар хьиз, куьтягь тежез, яргъи жедайтIа.
***
Чаз ганвайди чилел куьруь яшар я, инсан.
Амукьдайди чакай пака махар я, инсан.
Бедгьавая пуч тийин, ша, къизилдин кьит вахт,
АтIа дуьнья чIулав, къайи дагьар я, инсан.
***
Вуч гуьзел я! Гьамиша вун жегьил я, дуьня
КIанзавайди тамашдай ваз кьве вил я, дуьня.
сад билбил я ви бахчада, садни, есир хьиз,
Буькьуь яз рикI ви къузадик, сефил я, дуьня.
***
Чир хьухь, инсан, уьмуьр ганвач Эбеди яз чаз,
Вахт атала, хутахда чун чили, кьаз, чIугваз.
Яшайишдин гуьзелвилик кутур жуван пай,
Регьимлу тIвар и дуьньядал кан ятIа ваз таз.
***
Хъуьтуьл меци цаварални акъудда инсан,
ХцIи чIавуз кIвачерикни авудда инан.
Белки, цIухъни авач жеди мецин къуватар,
Суьгьурда тваз, агудизни къакъудда инсан.