Дагъустандин меркез Магьачкъаладавай Расул Гьамзатован тIварунихъ галай ктабханада, Дагъустандин халкьдин шаир, рагьметлу Байрам Салимоваз талукьарнавай мярекат кьиле фена. Шииратдин межлис кьиле тухвайди «Дагъустан» РГВК-дин художестводин программайрин директор Гуьлера Камилова тир. А мярекатдал Байрам Салимован уьмуьрдин рехъ рикIел хкиз гзаф шаирар ва писателяр атанвай. Мярекатдал ДР-дин Кхьирагрин КIватIалдин кьил Мегьамед Агьмедова, ДДУ-дин профессор Гьажи Гашарова, филологиядин илимрин доктор, кхьираг Гьаким Къурбана, Дагъустандин халкьдин кхьирагри — Абдуселим Исмаиловани Мегьамедрасул Мегьамед Расулова, «Дагъустан- Азербайжан» дуствилин тешкилатдин кьил Абдулкъафар Агьмедова, Этибар СтIурвиди, талант авай, дуьняда раиж хьайи шаирдикай гзаф хуш гафар лагьана. Гьар рахай касди Байрам Салимов гьихьтин михьи, милайим инсан тиртIа рикIел хкана. Лезги шииратда гьич садрани туьхуьн тийидай гъед тирди малумарна. Магьачкъаладин 28 лагьай нумрадин школадин аялри, ДДУ-дин филологиядин факултетдин студентри Байрам Салимован рикI атIудай, ругь секин тан тийидай шиирар кIелна. «Суна чан» тIвар алай манидаррин кIватIалди, мярекатдик квай лезги лувар амайдалайни виниз хкажна. Гьелбетда, Байрам Салимов чи халкьдин, чи шииратдин бегьер квай багъ я ва а багъдин бегьерри чун виш йисаралди шадарда.
Сулейман АХЦIЕГЬВИ,
“Аламдин” кор.