Адан сифте чина техникадин илимрин доктор, профессор, республикадин илимдин Лайих деятел, «Шуьгьрет» ордендин кавалер Камал Абдуллаеван портрет ганвай хьиз, кIваталдин «Инсан» тIвар алай сифте макъалани чи зурба алимдиз бахшнавайди я.
«За ам зи ватанэгьли, муаллим, дуст, хьуналди, лезги халкьдихъ ихьтин чIехи са хва авайвиляй такабурвалзава»- кхьизва адан автор, техникадин илимдин доктор, профессор, чи ватанэгьли тир Эшреф Баламетова.
Журналди чIехи камалэгьли, шаир, кхьираг, драматург, фолклорист Забит Ризванов дидедиз хьунин 90-йисаз талукь яз чара-чара материалар ганва.
Журналист Видади Севзиханован «Кьве генерал» кьил алай макъалада Урусатдин Воронеж шегьерда уьмуьрзавай чи кьве кьегьал ватанэгьлидин кьисметдикай, Камран Къурбаналиеван «Чи Алескер духтур» кьил алай зарисовкада алакьунар авай духтур, кьилин мефтIедин нейрохирург Алескер Гьесретован уьмуьрдикай ва къенин йикъан къайгъуйрикай ихтилат физва.
Журналда гьакIни чи тIвар-ван авай чIугвар Дарвин Велибегован Махачкъалада кьиле фейи выставкадикай, РФ-дин искусствойрин лайихлу деятел, машгьур композитор Мегьамед Гьуьсейнован 75 йисан юбилейдиз, шаир Арбен Къардашаз Халкьдин шаир, манидар Фаризат Зейналовадизни музыкант Шербет Рзакъулиеваз Лайихлу артист тIвар гуниз талукь материалар чапнава.
Профессор Ярали Яралиеван “Матенадаранадин алфавит арадал атуникай», тарихдин илимрин кандидат Фейруз Беделован “Дербент кIеледин тIвар», тарихдин илимрин кандидат Рамил Нифталиеван “Къубадин бунтар” кьил ганвай макъалаяр чи хальдин, гьамни чIалан тарих чириз канзавайбур патал маракьлубур я.
Журналист Гуьлера Камиловадин журналдин и тилитдик акатнавай шаир, кхьираг Пакизат Фетуллаевадихъ галаз ихтилат, Абир ЭчIехвидин “Кьвепеледин Амирван хуьр», Фехреддин Уружован «Тафаватдив фикирунин гьяз» тIварар алай макъалаяр ва къейдерни кIелдайбуру хушдаказ кьабулдайбур я.
Журналдин цIийи тилитда гьакIни чара-чара инсанрин рикIел хкунар, сиягьатдин къейдер, ктабрикай рецензияр, жегьил шаиррин шиирар гьатнава.
“КцIар” газет