“…Шагь суван кIане са хуьр ава. Зи хайи хуьр-СтIур… Зерифа Кьасумовани и хуьре чIехи хьанва. Инани мектеб акьалтIарна кьисметдин гелеваз хуьруьвай къакъатнава. А чIавалди Зерифади шиирар кхьиникай садазни хабар авачир. Белкини им стIурвийрин парабуруз хас тир жигьетрикай сад я. Ина саки гьар са кIвале шиир кхьизвайди ава. Амма парабуру кхьиз сандухда тазва, винел акъудиз кандач. Заз чидач, белки им хуьруьн дамахар тир СтIур Далагь, Байрам Салимов, Келентар Келентаррин хьтин зурба шаирриз авай чIехи гьуьрметдин аламат яз «зунни шаир я» лагьана майдандиз акъатиз кан тахьун ятIа… Белкини идан себеб стIурвийрихъ зун-зун лугьуз, вичи-вич вилик кутадай хесет тахьун?”.
Адан пуд лагьай, хайи чIалал сифтеди тир “СтIалрин гьуьл” тIвар алай ктабдин вилик гафуна икI кхьенва улубдин редактор, шаир Билал Адилова.
Уьмуьрдин рикIелай тефидай вакъиа тир юбилейдин, вили кьадай цIийи са ктабдин текьдиматдин юкъузни ада “зун-зун” лагьанач. Поэзиядал рикI алайбуру, дустари, багърийри гъил-гъиле гана КцIарин меркездин ктабханада шаирдин яратмишунриз бахшнавай мярекат кьиле тухвана.
Межлис ктабханадин отделдин зеведиш Суьдабе Багъиевади ачухна, юбиляр тебрикна, адан уьмуьр ва яратмишунрикай куьруь малумат гана: Чи райондин СтIур хуьре дидедиз хьайи Зерифа Кьасумовади Магьачкъаладин Университет кьутягьайдалай инихъ Къубада муаллимвалзава. Адан Бакуда басмадай акъатай “Шуша ферядлары” ва “Уьлвийет ювасы” ктабри шаирдиз машгьурвал, тIвар-ван гъана. Поэзиядин кьилин тематика хайи Ватан, чил ва халкь, инсанар ва абурун кьисметар тир шаирди девирдин кьетIенвилерикай хьиз, муьгьуьббатдикай, ашкъидикайни вичиз хас жуьреда кхьизва.
Ахпа мярекат идара авун паталди гаф “Алам” журналдин кьилин редактор Камран Къурбаналиеваз гана.
“Марвар” литературадин межлисдин кьил шаир Эйваз Гуьлалиева, карчи инсан Бегьрам Залова, шаир-муллимар Шихжамал Шихметова, Шагьмардан Агъакишиева, Зиядхан Мурадханова, Вакъиф Муьшкуьрвиди, журналистар Абир ЭчIехвиди, Руслан Шайдаева, Видади Севзиханова, Этибар СтIурвиди, Севинж Мамедовади, художник Дарвин Велибегова, шаирдин къелемдин дустар тир Адил Къайибханова, Римма Гьажимурадовади, Рамиз Къусарчайлыди, Закир Меммеда, Жейгьун Агъабегова, Лезги Бегьлула, Гуьнеш Мевланова Зерифа ханумдин поэзиядин кьетIенвилерикай, “СтIалрин гьуьл” тIвар алай ктабдикай чпин фикирар лагьана, юбиляр тебрикна адаз чандин сагъвал, уьмуьрдин ва поэзиядин рекьера мадни чIехи агалкьунар тIалабна.
КцIарин мектебрин кIелзавайбуру шаирдин шиирар Азербайжан ва лезги чIаларал хуралай лагьана.
Эхирдай гаф къачур шаирди и вижевай межлис тешкилунихъ къуьн кутурбуруз, райондин тешкилатрин регьберриз, вири иштиракчийриз разивал маламарна, лезги ва Азербайжан чIаларалди кхьенвай цIийи шиирар кIелна, вичин са кьадар ктабар ктабханадиз пишкешна.
“КцIар” газет