Играми кIелдайди, «Аламдин» сифте нумрадиз экв акур йикъалай вад йис алатзава. Виш йисалай яргъи уьмуьр авай, виш агъзурралди тиражралди гзаф санда газетни журнал чап жезвай Бакудин прессадин гьуьле чи журналдивай и вад йисан къене вичиздигай кьетIен чка кьаз хьанватIа, чи гъвечIи коллектив чи чIехи халкьдиз гьечеда ава, лагьай чIал я.
Девлетдин патай финансрин куьмекар авачиз, коллективдин, гьакIни рикIе халкьдин културадиз, литературадиз канивал авай кьегьал рухвайрин гьисабдай чна гардан кIир тавуна, садазни гъил ахъай тавуна жуван кар кьилиз акъудзава.
Чна арадиз гъайи «Марвар» литератур кIватIал кхьизвайбур патал ким, жегьилар патал са мектеб хьанва.
«Аламдин улубар» сериядик кваз чна акъудай цIикьвед улубдин гьар сада вичин кьетIенвилериз килигна чи литературадин тарихда вичиз лайих тир чка кьунал чун чIалахъ я.
Чна Бакуда, КцIара, Махачкъалада, Дербентда кьиле тухвай поэзиядинни манийрин нянийрин ван къедалдини къвезма.
ЧIал хуьн, ам патан чIаларин тасиррикай хкудун патал чна кьил кутур кIвалах мадни давам хъийизма. Чи чIал чIурзавай мишарни-ламишар, лиярни-луяр, сизарни-сузар, ныйарни-скийар чи чIалай акъудун паталди къваз тавуна алахъзава. Чилин винел чара чаларин гафар квачир са чIал­ни авайди туш. ГьакI чи чIалани гьикьван хьайитIани чара чIаларин гафар ава, абур къенлай кьулухъни чи чIалаз атун са чара авачир кар я. Чун и кардиз ваъ, къвезвай гафар чи чIалан къайдаяр чIурна атуниз акси я. Мисал яз, Коммунис­тический партиядин чкадал Коммунистрин, яни Коммунист партия хьайитIа дуьз жезва. Ва мад икI…
Урусатда уьмуьрзавай лезгийриз январь гафунин эхирда авай хъуьтуьлвилин лишан урус чIалан къайда тирди чизва. Бес, урус чIалакай хабар авачир Юкьван Азияда, Туьркияда, Азербайжандин мегъ патан районра уьмуьрзавай лезгияр январь гафунин эхирда авай хъуьтуьлвилин лишан куьз герек ятIа гьикI гъавурда тван? Арабривай къачунвай дуьнья гафуна кьвед лагьай хъуьтуьлвилин лишан куьз герек ятIа низ чида? Хъуьтуьлвилин лишан к, х, г, у гьарфарилай кьулухъ атайла абур гьикI дегиш жезватIа чизва, бес н, л, р гьарфарилай ахпа къвезвай хъуьтуьвилин лишан чи чIала вуч дегишвилер твазватIа урус чIал чин тийизвай виш агъзурралди лезгияр гьикI гъавурда акьурай? Щ, Ё гьарфари чи алфавитда вуч ийизвата урус чIалакай хабар авачирбур гьикI гъавурда тван?
Чи кьуьзуьбуру ихтилатардайди тир, Советрин хъсан чIавара магазиндай вичиз герек тир затIар къачуна хъфизвайбуруз мажбурна са кило чIемни гузвайди тир лугьуда. Гилани чна жуван хайи чIал чирун патал урус чIалан къайдаярни чирна кан жезва. Вучиз?
Чавай хьайитIа, чи чIал жуван къайдайриз муьтIуьгъардай чIав фадлай атана агакьнава. Бес, ам ни авурай? Чидай кас авани?
Советрин чIавара илимрин академияда ахьтин са орган авайди тир лугьудай. Гила амач. Бес, вуч ийин?
Чи са словардани гьат тавунвай «цIуру», «зуракI» хьтин вишералди гафар «литературный» чIала кухтун патал низ арза кхьин, гьи министрдин кьабулдиз фин?
Чидай кас авани?
Белки, чи кагьулвал, чи пассиввал, чи мискьи­вал ятIа чун и йикъаз гъанвайди?
Заз са кар хъсан чида, чун и гьалдай тек са чавай акъудиз жеда, мад садазни и кар герек туш.
Ша, чун санал алахъин!
Ша, чун гьар сад вич авай чкада алахъин!
Ша, чна гьар сада жувавай жедай жуьреда алахъин!

Кьилин редактордин гаф