Чи уьмуьрдин важиб атрибутрикай сад хьанвай Интернетдай лезги чIалаз талукьарнавай конфранс жеда лагьайла, заз рикIивайни хвеши хьана. Конфрансдиз зазни эвер гайила ва жуван фикирарни лугьудай имкан гуда лагьайла зи хвешивилин часпарар мадни гегьенш хьана. ЧIав атана агакьайла зунни Бакудавай лезги радиодин редактор Руслан Шейдаев виридалай вилик атана чкадал алай. Чи рехъ вилив хуьзвай ДДПУ-дин прессекретар Руслан Гереева чаз ацукьдай чка къалурна. Са герендилай духтурар — Нариман Рамазановни Эзедин Эсетов, профессорар — Руслан Къадимов, Шейдабег Мирзоев, Гьаким Къурбанни Фаида Гъаниева, режиссерар — Мирзабег Мирзабеговни Гуьлера Камилова, зарияр — Арбен Къардаш, Азиз Алеем, Фейзудин Нагъиев, рехи ксар — Шихсефи Сефихановни Сажидин Саидгьасанов, гьакIни Наира Рамазанова кьиле аваз Махачкъаладин лезги радиодин коллектив, жегьил зарияр — Сулейман Ахцегьви, Владик Батманон, Эмираслан Шерифалиев, Мегьамед Ибрагьимовни Равидин атана агатзавай. Аквар гьаларай конфранс вини гьавада кьиле фидайдаз ухшар авай. Девлетдин къуллугъдал алай ксарикай докладзвайбурун ва рахазвайбурун цIиргъина авайбур садни вили кьазвачир. Унверситетдин ректор Абдуллаев Магомед Имрановича кьиле тухузвай и кар аквар гьаларай девлетдин кьиле акъвазнавай касдин рикIяй тушир жеди. Девлетдин къуллугъдал алайбурукай садни татанваз акурла Магомед Имрановичани конфранс вахтунилай пара фад агална. РикIе гаф амайбурурувай программадик кватIани чпин гафар лугьуз хьанач. Вуч хъсан хьана, заз жуван фикирар лугьудай имкан гана. Конфранс тIуькIуьрайбуруз паракьан сагърай лагьайдалай кьулухъ пара яргъияр тавуна за жуван теклифар гана;
1. ЧIалан винел кIвалахун патал пешекаррикай девлетдин комиссия туькIуьрна адаз икьрарар кьабулдай ихтиярар гун.
2. За а комиссия патални чIалакай жуван теклифарни гана (чара чIаларай къвезвай гафар хайи чIалан къанунриз муьтIуьгъарна кьабулун, чара чIаларин иприйрикай менфят къачун тийин).
3. Дагъустандин Девлетдин Педагогикадин Унверситетдин Бакуда филиал ахъаюн патал герек тир инстанцийра крар кьилиз акъуддай комиссия туькIуьрун.
4. «Россотрудничестводин» квотайрик ДДУ-дин ва ДДПУ-дин филологиядин факултетарни кутаз гун патал абуруз чарар рекье тван.
5. Бакудавай Ломоносован тIварунихъ квай МДУ-дин филиалда Къавкъаз чIалар (лезги, авар, цIахур, рутул) чирзавай факултет ахъаюн патал лазим тир ксарихъ галаз ихтилар тухун.
За эхирдай конфрансда авайбурувай жуван и теклифар резолюциядикни кутун патал къарар кьабулунни тIалабнай. Зи ихтилатрилай ахпа конфрансдин сад лагьай пай куьтягь хьана. Вучиз ятIа конфрансдин кьвед лагьай пай хьанач. Кар зуракI туна вири чкIана. И кардин зун сакIани гъавурда акьунач…
Къурбаналийрин Камран