Гьилал Аскеров, филолог, са шумуд йисан къене Дербент шегьерда «Юждаг» институдин кафедрадиз регьбервал гайи муаллим, ва гьакIни бажарагъ, камал, дерин кьатIунар авай лезги халкьдин шаиррикай сад я.
Лезги халкьдихъ, лезги чилихъ, лезги чIалал рахун-луькIуьнрихъ вил хьанвай шаир саки 10 йисалай пара яз вичин хизандихъ галаз Волгоград шегьерда уьмуьрзава.
Вич гъурбатда аваз, лезги чIалахъ рикI кузвай шаирди, «Дом Дружбы» тIвар алай дараматда Лезги чIалан курсар арадал гъана. Шаир Гьилал Аскеров адет тирвал муаллим яз экъечIна, югъ къандавай адан гъилик лезги чIал чириз канзавай инсанрин кьадар пара жезва.
Завай Гьилал Аскерован агалкьунрикай югъ йифди акъваз тийиз рахаз, кхьиз жеда, амма къе ихтилат за адан цIийи улубдикай тухуда.
Алатай асирдин юкьварилай эгечIна шиирар, поэмаяр кхьизвай шаирдин са ктабни халкьдин арадиз, майдандиз акъатнавачир, амма 2017 лагьай йис чи шаирдиз пара бегьерквай, рикIик гьевес кутадай йисарикай сад хьана.
20I7 лагьай йисуз, редактор Ф. Оруджеван куьмекдалди Москва шегьерда шаир Гьилал Аскерован «Битаввал» тIвар алай сад лагьай улуб чапдай акъатна.

Садбуруз-гьакIан накьв, заз-чан я и чил.
Бубайрин руьгь кумай са тан я и чил.
Эл квачиз сувни чуьл баябанар я.
Халкь алаз хьайила Ватан я и чил!
(Гьилал Аскеров)

Шаирдин ктаб 5 паюникай ибарат я: «Зи ивиди кужумна вун, хайи чил»; «Уьмуьр бурж я вахтунивай къачузвай»; «РикIни вилер амукьда вал гьейран яз»; «КIватIи-кIватIаш»; «Жувазни икI кандай кхьиз (Маса чIаларай элкъуьрнавай шиирар). Шаир Гьилал Аскерован сифтегьан поэзиядин кIватIалда яхцIур йисалай гзаф девирда кхьенвай шииррин чешнеяр, гьакIни СтIал Сулейманан уьмуьр дин эхиримжи йикъариз талукьарнавай «ТуькIуьр тавур чIал» поэма гьатнава. Хайи халкьдин кьисметар, инсанрин арада авсият, канивал заридин къелемдикай хкатзавай кьилин темаяр я. Аялар патал туькIуьрнавай чIалар чи бицIекрин ругьдизни къилихриз диганва. Шаир Гьилал Аскерован гъиликай мад, лезги халкь шадардай, чIехи жезвай аялрик руьгь, гьевес кутадай шиирар, поэмаяр хкатдайди чун вири рикIивай чIалах я.
Зи рикIе авай мурадрикай, чи шаир Гьилал Аскероваз чандин сагъвални рикIин шадвал хьун я.

Омар КЪАЗИХАНОВ