Юг гатана на зи рикIе,
Ви нефесдин гел тунава.
Дуьня вири вун хьиз акваз
Кьуд пад закай хъел тунава.
***
ЯхцIуран мах вун хьана заз,
Амай вад югъ, тIал тахьурай.
Жуван экъуьн дегишара
Вил акьуна чIал тахьурай.
***
Зи ихтияр гумач жував,
Кьве вилив гва, алахьзавай.
РикI гатфарин жив хьанава,
Рагъ такуна авахьзавай.
***
Къакъан цава гъед хъуьрена,
Алатайдаз рехъ къалуриз.
Марал вуна агь чIугвамир,
Ван хьайидан рикI хъухъуриз.
***
Тек са стIал яд кIанзама,
Гьуьл кьерев кьван ацIун патал.
Са багьна я герек тирди
Ви наздикай катIун патал.
***
Селди сувай гъайи тарар
ВацIу кьерез хкадарна.
Ваз чинеба лагьай са гаф
На алемдив агакьарна.
***
Рахада мез верцIи-верцIи,
Перийрикай, Саядрикай.
За епинал хтар кIватIна
Лезги чIалан баядрикай.
***
Симерал зи тIуб экъвена,
РикIе авай ван акъудиз.
Маралди рехъ дигишарна,
И тандавай чан акъудиз.
***
Керемакай стха кьуна,
Са цверекьди кана лугьуз.
Рагьмет гъана Межнуназ за,
РикIикай яд хъвана лугьуз.
***
ТIалдин рикIей хъвер акъудна
Квез гуз ава кIанибур за.
Муьгьуьббатдин суьгьуьрда тваз
Агудзава къенибур за.
***
ВацIун кьерел часпар хьана,
Цацар алай симерикай.
Зи яр вацIун а патай я.
Лезет амач демерикай.
***
Гъалад пелел агь чугуна
Кьулан вацIал часпар акваз.
За Аллагьдиз тел ракъана
И зул хьтин гатфар акваз.
***
Зун ви патав чан кIаниди,
Таможнадай рекъе гьатна.
Азаб эхиз и дуьнядин,
Чандиз рикIин тике гьатна.
***
Гатун цкIиз жив кIан хьана
Ргазвай рикI серинариз.
Тек са баяд бес хьана заз,
Ярдин рахун ширинариз.
***
Къуьлуьн кьили цуьк ахъайна,
Зи шиирдин нике авай.
Алцурарин регьят я зун,
Жуван гьалал рекъе авай.
***
Цавун юкьвай рехъ кутуна,
Къушарин луж физ ава яр.
Зулун гарун аламат я,
Атир мукьув гъиз ава яр.
***
Зун фейи рехъ цIалIамди туш,
Кам эцигмир камарал зи.
Ашкъидикай мани лугьуз
Кьел алахмир хамарал зи.
***
Уьмуьр физвай ашкъид варар,
Шумуд сефер гатана за.
Валай са кам яргъа хьунни
Ашкъ вуч ятlа, кьатIана за.
***
Тавдин кьиле тават ава
Такабур гваз тIавус къуш хьиз.
Гаф лагьана хчуз жезвач
Тухузва вич шагьдин руш хьиз.