Гъиле авай йисан март вацра Дагъустан Республикадин кьиле авай кас Василев Бакудиз атана канзавайди тир. Ахпа гатуз къведа лагьана, ахпа зулухъ, гила йисни кьилиз акъатзава, атана акъатнач. Атайла ина уьмуьрзавай дагъустандин халкьарин векилрихъ галазни акуна канзавайди тир. А мярекатдал рахана жуван гаф лагьана канзавайбурун ц1иргъина зи т1варни авай. За жуван рахунар чи уьлквейрин арада авай часпардал алай физ-хуькведай контрол- ахъайдай пунктарикай авуна канзавайди тир. Мад Василев атанач. Заз жуван фикирар халкьдив агакьриз канзава.

Урусатни Азербайжан дуст уьлквеяр тирвиляй абурун арада авай часпардал алай физ-хуькведай контрол- ахъайдай пунктарални дуствилин гьава хьана канзавайди инкар тежедай факт я. Ша, гила чна и дуствал мадни гегьеншди авун патал, физ-хуьквезвай контрол- ахъайдай пунктарал алай гьалар хъсанрун патал, вуч авуна канзават1а килигна жуван теклифар гун.

1. Кьил кутан виридалай вине авай Ц1ехуьлринни- Гарагърин физ-хуькведай контрол- ахъайдай пунктунилай. Инай тек са яхъдиз физ-хуьквез жезва. Машинар ахъайзавач. Эвелра муькъвер авачирвиляй ахъайзавачир. Гила Ц1ехуьлринни Гарагърин муькъвер эцигна кардик акатайдалай кьулухъ и пунктунай гъвеч1и машинарни ахъаюниз игьтияж ава. Кьвед лагьайди и пунктуни йикъан тек са экуь ч1авуз к1валахиз, мич1и ч1авуз к1валахзавач. Эквер аваз хьайила и пунктуни суткадин мич1и ч1аваризни к1валах авурт1а пара хъсан жедай.

2. Ц1ехуьлрин муькъвелай агъада халкьдин арада «къизил муьгъ» хьиз чизвай «Самур-Ярагъ» контрол- ахъайдай пункт къвезва. И пунктуни суткада к1валахиз, ч1ехи ва гъвеч1и машинарни ахъайзават1ани яхъбур ахъайзавач. И татугайвални арадай акъудайт1а хъсан жедай.

3. Са т1имилни агъада «Ширвановка- Филер» контрол- ахъайдай пункт ава. И пунктни суткада к1валахзавайдаз элкъуьна, гъвеч1и машинарни ахъайдайвал авуниз са проблемни авач. И проблемни гьял хьанайт1а лап хъсан жедай.

4. «Яламадинни- Тагьирхуьруьн» контрол- ахъайдай пунктуни суткада к1валахиз гъвеч1и машинарни ахъайзават1ани яхъ физвайбур ахъайзавач. И проблени арадай акъудуниз канзавайди са касдин икърар я.

5. Гьуьлуьн кьерей Садлагьай Яламадай Приморск хуьруьз физвай рехъ ават1ани инал контрол- ахъайдай пункт алач. Гьич тахьайт1а гатун варцара хьайит1ани ина контрол- ахъайдай пунктуни к1валахнайт1а чи уьлквейрин арада авай дуствални туристрин алакъаярни мад гегьенш жедай.

6. Советрин гьукумат къведалди Ахцегьалай виняй «Салават» лугьур рехъни кардик квай. А рекьикай чи халкьари советар къведалди чпин хпер Ширвандиз, Мугъандиз тухвана хкин патакай менфят къачузвайди тир. Гила гьич тахьайт1а гатун варцара хьайит1ани а рехъни кардик кухтуна, анални са контрол- ахъайдай пункт эцигайт1а чи уьлквейрин арада авай дуствилин алакъаяр мадни гегьенш авуниз ч1ехи куьмек жедай.

И проблемар къенин йикъалдини актуал яз ама. Абур гьялуниз акси тир ксарни завай хьайит1а жеч. Бес и прблемар гьялун патал чна вуч авурт1а хъсан я?

Камран Аламви.