Къе ван хьайи са чlулав хабарди зи рикl къарсурна: Дагъустандин халкьдин артист, Стlал Сулейманан тlварунихъ галай Лезги Музыкадинни Драм Театрдин режиссор Мирзебегов Мирзебег Къадиран хва алай йисан апрелдин 29-аз рагьметдиз фенва…
Зи фикирар садлагьана яхцlурницlуд йис кьулухъ хъфена…
Эхь, 1970-йисарин сифте кьиле чна Бакуда кlелзавай лезги студентрин кlватlал арадал гъанвай. Чи къаст- СССР-дин 50-йисан юбилейдиз хъсандаказ гьазурвал акун, суварин йикъара лезги халкьдин култура амай халкьаризни къалурун тир. Чна сифте яз «Кьулан вацl» литературадин кlватlал тешкилна, гуьгъуьнай манийринни кьуьлерунин ансамблни арадал гъанай. Гила чаз гьа ансамблдин репитицияр кьиле тухун патал чка герек хьанвай. Са юкъуз Бакудин институтра кlелзавай виш кас кьван студент шегьердин юкьваллай 26 Бакудин Комиссардин мемориалдин вилик кlватl хьанай. Инал чаз икьван гагьда такунвай гадаяр-рушарни алай, са шумуд касдиз азербайжан чlал эсиллагь чизвачир. Анал малум хьанай хьи, абур Азербайжандин Културадинни Харусенятрин Институтда кlелун патал Дагъустандай ракъурнавай лезгийрин кьвед лагьай груп тир. Абур чаз чи гъиле авай крарани чlехи куьмек хьанай. Абурукай са шумудан тlвар зи рикlел къедалди алама: Агъалар, Кемале, Агъахан, Мирзебег ва мсб. Гаф кватайла лугьун: Абуру чаз чпин дипломдин тамашадиз- «Хуьруьн рушаз» килигунизни теклифнай.
«Гъетер» ансамблдин садлагьай концерт 1972-йисан декабрдин 2-аз «Дом медработников» тlвар алай клубда кьиле фенай. Концертдин программадихъ пакамандин лезги актйоррин кьве нумрани галай. Чи кьуьлердай группадин регьбер кьурагьви Мустафа тlвар алай касни, чаз Мирзебег стхади теклифайди тир.
Гьа икl, а йикъарилай инихъ зур асир кьван вахт алатнава. Квез малум тирвал, Мирзебег стхади гьа чlавалай къедалди, бегьем яхцlурни муьжуьд йисуз хайи халкьдин култура вилик тухун патал алахъна. И рекьера адакай Дагъустандин халкьдин артистни хьана!
Тlебиатдин къанунар гьикьван залан хьайитlани, абур чи ихтиярда авач: чавай абур я чlуриз жедач, яни дегишиз. Кьиникьни гьахъ я. Къе заз и чи арадай фенвай хъсан дуст, къени инсан тир Мирзебег стхадиз «Алам» журналдин, гьакlни «Марвар» литератур кlватlалдинни паталай аллгьди рагьметрай, лугьуз канзава.
Вакъиф Муьшкуьрви
