Са сефер Манкъулидин хуьре са поэзиядин кимел шаир Эйваза лагьанай:

— П1ит1иш хуьряй фидамаз ч1ехи Нуьсрета, Шагьнезера, Октая, Бахтияра, Афика, Рофела, Черкеса… хьиз манияр лугьуз кан жеда, Манкъулидин хуьриз атайла Абдуллагьа, Забита, Шихзадади, Медета, Риммади, Гуьлбеса… хьиз шиирар  кхьиз кан жеда.
И накьв, и чил, инсанар ч1алан, шиирдин, лирлидин, манидин, руьгьдин дуьнядин гиширар, нехишар я. Ина кьеп1инилай чурудал кьван вири шаирар я. И хуьре шиир лугьудамаз са т1имил мекъеят хьана ккан я.

Къе чи шиирда вичин рехъ, гаф авай «Марварви» руш, чи иер зари Римма Гьажимурадовадин 60 йис я. Гьажимурадова Римма 1960-йисан 11-ноябрдиз Шабран (Девечи) райондин Сиязан шегьерда дидедиз хьана. Гуьгъуьнилай абурун хизан чпин хайи хуьр тир Кцlар райондин Манкъулидхуьруьз куьч хьана.

Риммади тек шиир кхьидач, адаз гафни храз чида. Адан эсерар саки вири лезги газетра, журналра, шумуд алманахда акъатна. «Зи гъед» т1вар алай кьилдин улуб чапнава, «Алам» журналди тесис авунвай «Лезги халкьдин зари» дамахдин т1варциз лайих акунвай Риммади азербайжан ч1алални электрон улубни гьазурнава. Хайи ч1алал кхьенвай ц1ийи ктабни  къе-пака  к1елдайбурув агакьарда. Уьмуьрдин юлдаш Вакъиф Муьшкуьрвидихъ галаз санал чи шаир Кесиб Абдуллагьан ирс к1ват1на пуд ч1алал кьилдин ктаб хьиз акъудна, элдив агакьарнава. Шира Ашукь Нуьсретан манийрин к1ват1ални чапдиз гьазурзава.

«Марвар» литературадин к1ват1ал арадал гъайи, вилик тухун патал чан, рик1 эцигайбурукай сад тир Римма Бакуда, Дагъустанда хьайи чи вири межлисра рекьерин четинвилериз килиг тавуна иштиракна.

Чна чи вик1егь вахаз юбилей мубаракзава. Ви рик1е дат1ана хайи ч1ала хъвер авурай!

«АЛАМ», «Марвар»