Вуч хъсан  я, къе чи  поэзиядиз цIийи  жегьилар къвезва. Абурун арада чIал кани,  чил  кани, эл  кани  са жегьил- зи МЕРД ЗАРИ Владик иллаки тафаватлу жезва. Адакай хъсан  шаир жедайдал  зун чIалахъ я. Вучиз лагьайтIа, адаз михьи  РУЬГЬ ава. И къени  къилихрин гададин таза цIарара Ракъинин нурари, пак ашкъиди, кьелечI гьиссери адан пакахьан йикъакай муштулух гузва. Ваз агалкьунар хьурай, Мерд Зари.

Батманов Владик Нафирович 1995 йисан 16 октябрдиз Дагъустан Республикадин Хуьрелрин хуьре дидедиз хьана. Владикан туькIуьрунар райондин «Самурдин сес», республикадин «Лезги Газет», «Жегьил сесер» газетра мукьвал-мукьвал чапзава… Лагьана канда хьи, алатай йисуз «Куьредин Ярар» тlвар алай медениятдин маканди Владик Батманован «Билбил» тlвар алаз шииррин сифте улуб кlелдайбурув агакьарна… Ам «Куьредин Ярар» тlвар алай медениятдин макандин член я. Ада алай вахтунда Социально-педагогический колледждин 2 курсуна вичиз кlелунар давамарзава…

 Эйваз Марвар

Батманов Владик

Лезги ЧIал

(шиир)

Лезги чlалан пак гафарихъ галаз зун,

Таниш тир амаз гьеле кьепlина

И дуьньядиз эбеди яз зи чlал вун-

Машгьурна лап Сулеймана, Эмина.

Асирра ваз дерин тарих авазва,

Агъзурал кас лезги чlалал рахазва,

Каинатда-тарифди вун жакьвазва,

Вачед тур хьиз хупI хци я, лезги чlал.

Чи гафарган гуьрчег я генг яйлах хьиз,

Чи гьар са гаф заз михьи я булах хьиз,

Хуш я рикlиз вакай шиир мад кхьиз,

Тlебиатдин наз, гуьзгуь я, лезги чlал.

Зи багъри чlал аманат я бубайрин,

Диде я ам векlегь, уьтквем рухвайрин,

Сагьиб я, чlал зериф, кьезил гафарин,

Зи гьиссерин иеси я, лезги чlал.

Ви гьар са гаф гьар лезгидин дарман я,

Ви гьар са гьарф  багьа якъут, мержан я,

Зи лезги чlал, Лезгистан зи ватан я.

Владиказ чан хьиз кани, Лезги чlал.

Герек

(Гъезел)

Ашкъид рекъе экъвена рикI, муьгьуьбатдиз девран герек,

РикIин къене ягъазавай цIайлапандин тIурфан герек.

Муьгьуьбат са хару цуьк я, адан хатур хаз тахьурай,

Канивилин багъдин юкьвал, цуькверикай карван герек

Уьмуьрдин рехъ са цIарцIаваз ашкъид къадир хуьн паталди,

Муьгьуьббатдин тIаларикай суза чIугвай инсан герек.

ГьикI чидай кьван кьиляй-кьилиз са уьмуьрдин имтагьан я,

Канивилин сир жагъуриз фани чилел аман герек.

Хьун тавурай ашкъид рекъе, гьич садани рикIиз дуван,

Ашкъид суза сагъ жен патал уьмуьрдиз тай заман герек.

Кьисмет ая первердигар канибурун рикIер шад хьуй,

Муьгьуьбатдив рикI шад авур, рикIин патав султан герек.

Эх ая чан, гьикьван тIалар ава рикIиз и дуьняда,

Вилиз акур тIалар кхьиз, рикIин юлдаш Сархан герек.

Сархан Ярагьмедов