Алай йисан 25-октябрдиз Рашид Бейбутован тIварунихъ галай Гьукуматдин Манийрин Театрда «Алам» лезги медениятдин журналди «Марвар» лезги литературадин кIватIалдихъ галаз санал туькIуьрнавай «Манийралди, гафаралди…» тIвар алай лезги литературадин ва музыкадин нян кьиле фена. Няниз чи популяр манидарар чпин цIийи маниярни авазар, чи тIвар-ван авай зариярни цIийи шиирар гваз мугьман тир. Мярекат тхузвайди чи «Лезги Левитан»- Руслан Шейдаев тир. Нян чи играми профессор, илимрин доктор, са шумуд уьлкведин илимрин академиядин академик Камал Абдуллаева ахъайна. Уьлкве, халкь патал чIехи метлеб авай вакъиадикай, уьлкведин президентдин хкягъунрикай ихтилатна, чи девлетдин башчидиз вилик галай йисара агалкьунар тIалабна. Ахпа гаф шаирриз гана: Бажиханум Исаевади вичин гъезелар, Вакъиф Муьшкуьрвиди, Римма Гаджимурадовади, Зерифе Кьасумовади чпин цIийи шиирар кIелна.Аудитория галуд тийин паталди «2012- йисан манидар» тIвар къачур Магьира Шириновади гафар Бажиханум Исаевадин, мелодия вичин тир «Перизада» ва чIалар Вакъиф Муьшкуьрвидин, мелодия мадни вичин тир «Хьилерин хуьр» манияр лагьана. Залда ацукьнавай са гъвечIи рушавай манидин аваздал секин акъвазиз хьанач, сегьнедиз акъатна са кьуьлерни авуна. Литература тарифдив ваъ, критикадив вилик фида. Гьавиляй гаф чи играми муаллим-журналист Зиядхан Мурадхановаз гана. Ада алатай ва алай девирдин лезги литературадикай, чара-чара шаиррин яратмишунрикай вичин фикирар лагьана. Гуьгъуьналлаз гаф мадни манидарриз гана. Сегьнедиз «2012 йисан манидар» тIвар къачур мад са манидар, Дагъустандай хсуси яз «Аламдин» эверуналди атанвай Руслан Пирвердиев акъатна. Аудиториядин тIалабуналди манидарди акапеллони лагьана. Поэзиядин нян шаир Гуьлялийрин Эйваза давамарна. Ада хуралай, вичиз хас пафосдив лагьай шиирри залда авайбурун рикIера экв, цIай ктуна. «Аламдин» кIелдайбуриз хьсан чидай Бести Нифтиевадин Келентер Келентерли, Вакъиф Муьшкуьрви, Римма Гаджимурадова, Билал Адилован шиирарин урус чIалаз таржумаярни аудиториядиз гзаф бегенмиш хьана. …Сад лагьана сегьнедин кьулукай чуьнгуьрдин ван атана. И ванарикай чи халкьдин рикIиз кIани тир «Шагьзада» мани хьана ва межлисдиз кIватI хьанвайбурун кIапаралди Дагъустандай атанавай Ашукь Шемшир юкьвал акъатна. Ашукьди «Шагьзада», «Кани яр» манияр лагьана, и манийрин тарихдикай, алатай ва алай девирдин лезги ашукьрикай верцIи ихтилатар авуна. Руслан Шейдаева чи арада авачир рагьметлу Келентер Келентерлидин, мярекатда иштиракдай мумкинвал тахьай Муьзеффер Меликмамедов ва Билал Адилован, залда чка кьунвай Шерафет Дагъустанвидин шииррикай чешнеяр кIелна. Профессор Этгьем Шагьмурадова лезги поэзиядикай вичин фикирар лагьана, Асеф Мегьманан, Алимурад Шагьдагъвидин шиирар кIелна. Межлисдин мугьман тир азербайжанви шаир Муьбариз Несибогълуди Келентер Келентерлидин туькIурунарикай, чпин дуствиликай рахана, шаирдин са шумуд шиир кIелна. Йиф суьрпризар галачизни хьанач. Залдай Тамам тIвар алай са гъвечIи руша (шаир Вакъиф Муьшкуьрвидин хтулди) Руслан Шейдаевавай вичиз бубади туькIуьрай шиир кIелдай мажал гун тIалабна. Аялдин шиирди межлисдин иштиракчийрин рикIериз рехъ жагъурна. Мярекатдиз са кьадар сатирадин кьел кчахай ясабви стомотолог, поэзиядин чIехи хиридар Къудрат Мегьдиева Кьилегь Къудратан, Магьсим Магьсимован, Къагьриман Якъубован шиир хуралай лагьана, мезели кьисаяр ахъаюналди межлисдиз мадни гурвал гана. «РикIин гаф» лезги литературадин кIватIалдилай кьулух кьиле фей сад лагьай ихьтин мярекат виридаз пара кьван хуш хьана. Лезги зарияр халкьдиз чирдай ихьтин мярекатар мадни пара хьурай!
Анар Уьнуьгъви, Баку шегьер»КЦlАР» газет