Бакуда чапзавай “Алам” журналдин 4-нумра кIелдайбурув агакьнава. Адан кар алай ва метлеблу макъалайрикай тIвар кьаз жедайбур садни-кьвед туш. “Халкьдин арадай акъатнавай артист” (Айдунбег Камиловакай), “Чахъ авай са Назим” (дзюдодай Барселонадин Олимпиададин чемпион Гьуьсейновакай), “Халкь паталди чIехи крар авурбур” (СтIал Сулейманан тIварунихъ галай Лезгийрин госмуздрамтеатрдин режиссер Багъиш Айдаевакай, Дагъустандин телевиденидин режиссер, журналист Фатагь Къурбановакай), “Дуьшуьшдинбур тушир дуьшуьшар” (хейлин кинофильмайра кьилин ролар къугъвай Акбер Фарзалиевакай) кхьенвай макъалаяр ва очеркар фикир желбдайбур хьанва. Журналдин тешкилатчийри хиве кьурвал, милли медениятдин, эдебиятдин, тарихдин месэлайриз журналда гзаф фикир гузва. Нумрадай нумрадиз лезги чIалан тарихдиз, лезги роман арадал атуниз талукьарнавай материалар акъатзава. Журналистри гьам Азербайжан ва гьам Дагъустан республикайра кьиле физвай вакъиаярни фикирдай акъудзавач. Ахцегьа кьиле фейи “Шарвилидин” сувариз ва лезги халкьдин “Шарвили” игитвилин эпосдиз са шумуд чин ганва. Журналди лезгияр ва стха халкьар яшамиш жезвай хуьрерикай (и нумрада Рутул райондин хуьрерикай), адетрикай, тухумрикай, чкайрин тIварарикай, гуьзел пипIерикай ихтилатзава. Журналда гьакI Мегьамед Гьуьсейнован, Азиз Мирзабегован, Натик Сефиеван цIийиз чапдай акъатнавай ктабрикай куьрелди малуматар ганва. Гьелбетда, журналда шииратдизни чка ганва. Зари Эйвазан лирлийри, Азиз Мирзабегова таржума авунвай Вильям Шекспиран шиирри кIелзавайбурун фикир чпел желбда. Журналда рекламадини вижевай чка кьунва.

Лезги газет