2014 йисуз нава (апрел) вацран 5-даз Бакуда «Алам» журналдин редакцияда «Марварин» нубатдин кIватIал кьиле фена. Мярекат адет яз кIватIалдин чIехид Гуьлалийрин Эйваза ахъайна, ада эверуниз гьай гана атанавай Вакъиф Муьшкуьрви, Бажиханум Исаева, Дарвин Велибеков, Жалал Жалалов, Абир ЭчIехви Римма Гьажимурадова, Бести Нифтиева, Анар Уьнуьгъви, Решад Ибрагьимов, Жавид Миграгъви, Мурад Гьажибабаев, Магьира Шириновадиз,   «Куьн атуй, рагъ атуй» лагьана, мярекат авална.
Мярекатда шаирар Бажиханум Исаева, Вакъиф Муьшкуьрви, Эйваз Гуьлялийрин, Римма Гьажимурадовади чпин шиирар кIелна, Абир ЭчIехвиди вичин цIийи кьисадикай гафна, Бести Нифтиевади Билал Адилов, Келентер Келентеров, Римма Гьажимурадовадин урус чIалаз элкъурнавай шиирар кIелна. К1елай эсерар тегьлилна. И «Марвар» са зариятдин ваъ, гьамни културадин кимел элкъвена: манидарар Магьира Шириновани Решад Ибрагьимова чпин манийрив, ч1угвар Дарвин Велибекова харусенятдикай, эзотерикадикай авур эхтилатрив мярекатдихъ ранг ктуна,
«Марвар»ин и кIватIалдани виликан кIватIалра хьиз са тIвар-ван авай шаирарин ваъ, гьамни жегьил шаиррин шиираркай гафна, абурикай «Алам» лезги културадин журналдин къведай тIилитIда чапдиз гудайбур хкягъна.
Гьа икI, «Марвар»ин и кIватIални кьиле фена. Къведай кIватIал са вацралай, адет яз сад лагьай киш (суббота) юкъуз кьиле фида.