ТЕЛЕФОН 

Заз къачуна телефон къе зи дахди, 
Спичкадиз ухшар авай гъвечIи са. 
Зенг ийизва гила за зи дамахдив, 
Зи дустуниз, накь зенг авур вичи заз. 
Стхадиз зенг ийизва зи ахпа за, 
Хуьзвай хпер Силибирдин синерал. 
За зи вири мукъва-къилид ахквада,
КIвалахзавай шегьеррани гьуьлерал.
Телефон туш, я им цIелхем вахтунин,
Чин тийидай яргъалвилер, сергьятар.
Ийиз вине дережаяр рахунин,
Мягькемзавай арайравай гьуьрметар.
(Б. Салимов)

Чубарук

Чубарук,чубарук
Ракъар гваз ша чаз.
Чими тир,яргъи тир
Йикъар гваз ша чаз.
Мукунив кьар агуда,
Шарагарни акъуда.
Чубарук,чубарук,
Цуьквер гваз ша чаз,
КIелериз гун патал
Векьер гваз ша чаз…
Вун гатфар кьван хъсан я,
Чаз гатфар хьиз масан я.
(А. Мегьман)

ЧIалахъхьунар

* Вил рекьи тухудайла, мугьман къведа!-лугьуда.
* ТупIун кикез лацу тIвех ягъайла, ваз цIийи пек жеда, -лугьуда.
* Хатадай хьиз яд чкIайтIа, кар алахьда, -лугьуда.
* Ахварай балкIан акун-мурад, цIай акун-фитне, аял акун-хъсан хабар я!-лугьуда.
* АцIай квар-алахьда кар, -лугьуда.
* Аялди вичин кIвачерин арадай кьулухъ килигайла мугьман къведа, — лугьуда.

КЬВЕ ВАХАН МАХ
Хьана кьван, хьанач кьван кьве вах. Абуруз касни авачир. Са юкъуз и вахарикай гъвечIида чIехи вахаз лагьана:
-Чан вах, чун тек я, чаз садни авач. Ша, чна чаз экъвена са баде хьайитIани жагъурин. Чаз чIехивалрай, акьул гурай.
И чIехи вах чIуру хесетар квай, квелинди, масада лагьай гаф кьан тийидай, вичиз чидайди ахъай тийидай сад тир. Гьавиляй ада икI лагьана:
-Вач, ахлад! Чу жув, зун вахъ галаз къари-маридихъ экъведайди туш!
Чара атIай гъвечIи вах текдиз рекье гьатна, и мягьледа экъвена, а мягьледа экъвена, жагъанач. Идавай жузуна, адавай суракьна, эхирни са касди тек уьмуьрзавай кьуьзуь са къаридин тIахма лишан гана. Руш кичIез-кичIез, яраб и бадеди вуч лугьудатIа фагьумиз-фагьумиз къаридин тIахмадив эгечIна. И чIавуз къари тIахмадин цлан кIане ацукьнаваз хьана. Рушаз акурвалдини и нурани къари адан рикIиз чими хьана. Ада къаридиз салам гана, жузун-качузун авуна, ахпани вич вучиз атанвайди ятIа адаз лагьана. Аман-минет авуна:
-Чан баде, аман баде, вазни касни авач, чазни. Ша чи кIвализ чахъ галаз уьмуьра жуваз. Вун чаз баде хьурай, чунни ваз хтулар.
«Хьурай ман, чан бала», лагьана баде рази хьана, атана абурун кIвале ацукьна, баде хьана и вахариз. Гьа атай йикъалай къаридиз и кьве вахан хесетрин арада гьикьван тефир-тафавут аватIа акуна, чир хьана.
Къариди атай пакадин юкъуз чIехи рушаз крар буюриз кьил кутуна. ЧIехи руша ада лагьай са карни кьилиз акъуднач. «Ахлад, я къари, залай гъвечIиди аваз-аваз за вучиз ийида?» лугьуз кьил къакъудна. Къариди и рушаз:
-Са истикан чай хьайитIани цуз ман, заз, чан руш,- лагьана.-Къарагъ, баде кьий ви сивиз, къарагъ, минет хьуй ваз…
«Ээгь» лагьана, эхир руш къарагъна. Истикан къайнар цяй чуьхвена, яд пенжердай чилел ичIирна. Накьвадлай ванер хкаж хьана: «Аман, аман, кана, аман, аман!» И кар акур бадедивай эхиз хьанач, лагьана:
-Чан бала, чилел йиргар яд ичIирдай затI туш. Гунагь я. Накьвадални чан алайди я. Ада ваз къаргъишда.
ЧIехи руша мад «ээгь, ахлад, къари!» лагьана. ГъвечIи руша чIехи ваха гргар яд ичIирай чкадал фад фена къайи яд кучахна, вичи-вичиз кушкушна: «Чан чил, чан накьв, гъил къачу гунагьдилай зи вахан!» Адаз ван атана садлагьана икI лугьудай: «баракаллагь, чан руш, заз лап регьят хьана!..»
Бадеди чIехи рушаз суфра ахъайна са кIус фу гъваш лагьана:
-Гишин хьанва бадедиз, гъваш кван, чан бала, вуч аватIани…
«Уфф, и къари зи кьилиз бала хьанва лап!» лагьана чIехи руша квелинз-квелинз, хъел галаз суфра акайна чилел. Фу гъана суфрадин юкьвал гьялчна фена. Къафунни гъана, къафун авай бадидизни къари галай патахъ румар гана, кIваляй экъечIна. Къаридивай мад эхиз хьанач, адан гуьгъ­уьна гьарайна:
-Я бала, суфрадал фу гъидайла а фу аставилив эцигир кьван я, гьялчдай затI туш. Хъфирлани далу суфрадик элкъуьрдай затI туш.
-Пагь, бес ия кван, я паб, вуув,- лагьана руша.-Далу элкъуьр тийиз вун эвлиян-затI яни?
Бадеди куьтIни авунач. Са кIус фу тIуьна, чIехи рушаз суфра хчу лагьана. ЧIехи руша яб ганач. ГъвечIи руш и чIавуз яд гъиз булахдал фенваз хьана. Бадени чилел алай и суьфрадиз килигиз амазмай. Эхир бадедивай акъвазиз хьанач:
-Аку бала, лагьанач лугьумир, суьфра икьван чIавалди къакъаж тавуна чилел тадай затI туш, гунагь я. Ам малаикри чпин гъилерал кьуна хуьзвайди я.
ЧIехи рушан чанди мад цIай кьуна:
-Я кьей къари, бес я ман! А ви малаикар залай артух яни? Кьуна акъвазрай чпиз кандай кьван! Ваз вуч ава? За заз кан хьайила хчуда суьфре!..
И чIавуз гъвечIи вах булахдилай хтана. КIвализ гьахьдамаз адаз шуькIуь ванер атана, абуру лугьузвай: «Агь, гъилер, чи гъилер галатна! И суф­ра хчудай кас жедач жал и кIвале? Агь, зи гъилер!..» ГъвечIи руша зверна суфрадин патав астадай лагьана:
-Чан малаикар, куьн галатна хьи! За гьасятда хчуда!
Руша суфра къакъажна, малейикрини адаз кушкушна: «Чан сагъ хьурай ви, чан вах, са чIавузни икьван геждалди суфра хчун тавуна тамир. А ви вахаз чна гьикьван гьарай туртIани ван къведач хьи!»
Бадедизни и гъвечIи рушан хатур кандай. Ада бадедин чIалаз килигдай, ада лагьай са карни чилел тадачир. Са юкъуз и кIвализ чIехи рушаз илчи­яр атана. Абур къведайла пенжердин кIаникай накьвадлай шуькуь, хару ванер хкаж хьана:
-ГъвечIи руш, гъвечIи руш! Гьам хъсан руш я! Гьам це лагь бадедиз!..
Илчияр инихъ-анихъ килигна, касни акунач. Абуруз чпин япара ван гьатай хьиз хьанвай. Амма абуру са тIимил дикъет гана килигнайтIа, цлан кIане юзазвай, рахазвай цуьквер, векьер аквадай. Мугьманар кIвализ гьахьна, бадени рушар абурун вилик экъечIна, «хвашкалди» авуна. Мугьманар ацукьна вилик суфра гъана акайдамаз мад кIвале ванер гьатна:
-ГъвечIи руш, гъвечIи руш хъсан я!
Мугьманари бадедиз чеб вучиз атанвайди ятIа лагьана:»И рушарикай гъвечIиди гьим ятIа, чаз гьа руш чи гададиз це лугьуз канзава.»
-Твах, чан балаяр, квез гьи руш кандатIа, гьа гьам за куь гададиз гуда.
Са тIимил чIавалай мехъерар хьана и кIвале. ГъвечIи руш гъуьлуьз фена, чIехи руш амукьна кьил-мет гатаз. Бадедивай вичиз крар, ацукьун-къарагъун чирзавалда гила. Акван ман, мус ахъа жедатIа адан бахт? Гьа идални и мах куьтягь жезва, куьн сагъ, зунни саламат.

Мах кхьейди Римма СЕЙЛИ я.

Вилер хуьниз фикир це!
Азиз балаяр, вилерин экв бицIи чIавалай хвена канзавай нямет я. Гьаниз килигна аялзамаз гьар садаз вилерин къадир, абур хуьнин рекьер чирна канда.
Чи редакцияди винидихъ галай кьатIун фагьумда кьуна, вилерин духтур Фатима Алкадарскаядин меслятар квел агакьарзава.
Телевизордиз гьикI килигда?
1. Телевизордиз мукьва ва адавай яргъа, жуван вилериз аквазвай тегьердиз килигна, ацукь.
2. Кьил элкъуьрмир ва гагь санихъ, гагь масанихъ юзурни ийимир, экрандиз дуьз килиг.
3. Мукьвал-мукьвал вилерив лупI-лупI ийиз тур, дериндай нефес къачу.
4. Вилер экрандин тек са чкадал алкIурмир, абуру вири экранда сиягьат авурай.
5. Мукьвал-мукьвал вилер явашдиз акьала. И береда вилин дамарри са легьзе ял яда.
6. Жезмай кьван экрандин вилик дуьз(са къвалахъай ваъ)ацукь.

«Лезги газет»

ИМУЧА-МУЧАЯР

Имуча-муча, муч халича:
Чилин чин я ам чIулав,
Набататриз чан гудай.
* * *
Имуча-муча, муч халича:
КIвачер акIурна чиле,
Са чкадал къвазнава.
Гьамиша гъилер цава,
Гъуцаривай дадзава?
* * *
Имуча-муча, муч халича:
Лагь кван ам гьихьтин свас я,
Гьи касдиз чидатIа фад,
Чамра адаллай пекер
Гьа хтунир кьван сад-сад,
Гададин вилин накъвар,
Сел хьиз авахьзавай мад.
* * *
Имуча-муча, муч халича:
Ам гьи тар я, ваз чидан,
Йикъа са пеш вегьида?
* * *
Имуча-муча, муч халича:
Физ-хкведа булахдал,
Лагь, ам вуч я куьне заз,
Амма садран(и) ях фидач,
Фида масдан къуьнеллаз.
* * *
Имуча-муча, муч халича:
Гьихьтин яц я, им чидач,
Вуна тум кьун тавуртIа,
Цурин къенез хъфидач.
* * *
Имуча-муча, муч халича:
Са бубадин ирид хва,
Вири са буйда ава?
* * *
Имуча-муча, муч халича:
Чи кIвале са кас ава,
Сиве тек кьве сас ава.
* * *
Имуча-муча, муч халича:
Бубадиз ава, имидиз авач,
Халудиз ава, эмедиз авач?
* * *
Имуча-муча, муч халича:
ЯхцIур итим ксанва,
Кьилер са патахъ, гьакIа
ГъвечIи сандухдин къене.
Сандух чи къулан тIакIа.
* * *
Имуча-муча, муч халича:
Им вуч затI я, чидан ваз,
Адан чиниз килигна,
Акурди жув хьана заз?!
* * *
Имуча-муча, муч халича:
Са къуй ава чи кIвале,
Къене михьи яд авай.
Цевай гъуьлягъдин сивяй,
Гьар патахъ чкIизва цIай.

Имуча-мучаяр туькIуьрайди
Жалал БАГЪИРАШТУЛ я