Нурарилай ал Ракъинин
Вуна къуват къачунвани?
«-Ви чIав фенва…»-лагьайтIани
Жуван елкен ахъайна генг,
Заманадин хурал вуна
Игитди хьиз тухузва женг.
Чи бицIекрин мецел къвана,
ЦIийи кьиляй цуькда вуна.
Гьар сесина, гьар гафуна
Чи Къав сувун ни-ял гала,
Вучиз ваз и шиир скьал
Къвезва кьакьан хиял галаз?
Зи лезги чIал къванцин ни квай!
А ви хурал ахваравай
Ахъа жерла сирер, давар,
Акьазва лап дуьз рикIелай!
Тапаррин мез галкIизва гьикI,
Экъис жезва гьахъ руг алай!
Къул я чими чи гьар са хур,

Агата, дуст, хамир хатур,
Туш зи чIалан гуьзгуь какур:
Дуьз рахада ана тарих,
Пелазг баде, Алпан буба…
Чахъ суй ава михьи, ари…
ЦIун дигедин цIай галай чIал!
Авач чидайд ви яш, ви чIав…
Чи дагъларин кукIушни рав
Ви яшдаван? Низ чида, низ?
Заманади вичин сирер
Чуьнуьхариз, гагьни чIуриз.
Алатна фей агъзур йисар,
Ийизва на такур кьасар.
ЧIаларин вун хару, масан,
Вах яни вун, диде яни?
ЧIалаз тахай килигайтIа,
Дав жеда ви гуьгьуьл, мани…
Вун Гъуцари чав гайи нур,
Лезги халкьдин ван я вун гур
На вахтуниз ганва кучIур.
Эгьрамрилай зи вини чIал
КIариз физва асирар на,
Зи игит чIал, зи къени чIал!

Римма Сейли (Гьажимурадова)