Абир малимдин пудкъад йис хьанва лагьайла, заз сакIани чIалахъ жез канзавач. Пудкъад са акьван чIехи яш туштIани элкъвена кьулухъ килиг хъийидай чIав я. Зунни Абир малим са хуьряй ятIани чун таниш хьана са къад йисалай пара чIав жезва. Чи танишвални къалмакъал квай са мярекатдал, Бакуда кьудкъанни цIуд лагьай йисара Урусрин посол ацукьзавай Интурист гостиницадин вилик кьиле фейи «Самурдин» пикетда хьана. Зун жегьилар ва студентар галаз «Самурдин» радикал, анжах Абир малимни Али Мусаеван партократ кьуьзуьбурни кваз концерваторрин хиле авай. Гьа пикетдал чи политик менфятар галукьна. Анал зи гъиле авай плакат кукIварай касни Абир малим тирди заз гуьгъуьнай чир хьанай. И кардикай,  жуван гъиле авай плакат гудай касдикай за а чIавара са макъалани кхьенай. Гьа пикетдал зун сифте яз туьрмедани ацукьарнай. Гуьгъуьнай «Самур» кьве чкадал пай хьанай. Зун Лезги Демократ Партия туькIуьрайбурухъ акатнай. Абир малимди «Самурдин» Азизбеков райондин хилез регьбервализ кьил кутуна. А йисара Абир Тагьирова Руслан Шейдаевахъ галаз гъил-гъиле гана Артемдин ва Бузовнадин мектебра лезги чIалан тарсар гана, чи классик шаиррин юбилейдин мярекатар, алай чIаван шаиррин поэзиядин нянияр, лезги манидаррин концертар кьиле тухвана. Вичелай алакьдай жуь­- реда хайи халкьдин милли вичкьатIунар пара ийиз алахъна. Къени гьа рехъ кьуна физва… 

Вичи лугьунрай мектебда кIелдай чIавара рангунин карандашар такур кас мектеб акьалтрайла Бакуда А.Азимзадедин тIварунихъ квай жудожникрин мектебдиз гьахьзава. Мектеб куьтягьай Абир Тагьироваз кIелунар Тбилисидин вини дережедин художникрин мектебда давамар хъийиз кан жезва. Буба Зейнеддина хцивай «Тбилисидавай мектебни куьтягь хъувурла вакай вуч хъижезавайди я», лагьай жузуниз гайи «мад жудожник», жаваб адан гьич хушуниз атаначир. «Вун анаг куьтягь тавунмазни жудожник яз хьайила, артухан кIелунар гьакI вахт ракъурун тушни» лагьанай. Гьавиляй виридалай гъвечIи, верци хва хьунизни килиг тавуна Зейнеддин хци кIелунар давам хъвунал сакIани рази хьаначир.

Абир малимдикай зурба художник хьаначтIани абурун хесетар кьунва. Я алукIзавай пекерикай, я рахазвай ихтилатрикай, я ийизвай крарикай са кIусни комплекс авач. Вичин девирдин хуьруьнвийри хьиз уьмуьрдин юлдаш хкягъдайла хуьруьнвийрикай, къунши хуьруьнвийрикай ваъ, Бакудин татаррикай хкягънава. Яргъи чIарар хуьзва, жуьреба рангарин пекер алукьзава, кIвачел къени кросовкаяр алукIзава, туьтуьна садрани галстук твазвач…

ЯхцIурни цIемуьжуьд йис хьайила ДДУ-дин лезги чIалан филологиядин факултетдиз гьахьзава. Адан  оптимизмдин сергьятриз и кьил, а кьил авач. Садрани рекьиз акъатиз квелинвалдач, алакьдай са кардизни ваъ лугьудач, чин тийидайди алахъна чирда…

Югъ няни хьайи чкадал йиф авуртIани хайи хуьр садрани рикIелай ракъурзавач. Суварриз, мехъерриз, гьакIни гъиле са гъвечI имкан хьайила хайи хуьруьз хъфида. Хуьруьн чIехи тарих авай мискIин алай чка чир хъвуна хандакIар михьна винел акъуд хъувунва. Хуьре авай латун винел пад Абир малимдин Азизбеков районда сифте яз 1985-йисуз тукуьрай кооперативди эцигнава. Девришан булахдал алай кьил кIеви ацукьдай чкани гьа кооперативдин крарикай я. Алай чIавуз хуьруькай этнографиядин улубни кхьизва…

Са гафуналди кьуьзуьвилин жегьилвилиз сифте камар вегьизвай Абир малимдихъ жегьилвилин цIвегь кума. ЧIехи гъуцар вичиз куьмек хьурай! Гьа вичи лагьайвал ви пудкъадакай ВИШ хьурай, Абир малим!

Камран Аламви