“Марвар” литератур кIватIалдин кьил, шаир Эйваз Гуьлалийрин “Экв” тIвар алай ктаб Бакуда, “Араз” нешриятда экуьнал акъатнава. Чи гъилевай и ктаб Эйваз муалимдин пуд лагьай ктаб я. И ктабдини чи поэзиядал рикI алайбурун гуьгьуьлдиз рехъ ахъайдайдан чIалахъ я. Вучиз лагьайтIа, адан шиирар вичи лагьайвал «рикI къелемдал, къелемни рикIел аруш хьана» арадал къвезвайди я. Эйваз муаллимдин поэзиядиз хъуьтуьл, хару гьиссер, саявал хас я. Адан шииррин чIал кьезилди я, ам булах хьиз авахьзава, вичин гьар са шиирда дидед чIалан михьивал, иервал хуьз алахънава.
Ам кьиляй-кьилиз гьейранвал я. Адан рикIе хайи чилин тIебиатдиз гьейранвал, куьтягь тежер са канивал ава, и канивал адан шиирриз авахьнава стIал-стIал.
И цIарар Эйваз муаллимдин уьмуьрдин девиз, рикIин мурад я, заз чиз: Лезги шиир пIир авун! Гьикьван хъсан гаф! Якъин шаиррин «Марвар» тIвар алай кIватIал гьавиляй арадал гъанвайди я. И кIватIалдин гьар са межлис гзаф маракьдив кьиле физва.

Эйваз муаллимдин экуь рангарин, мили поэзия кIелдайбурун рикIивай жеда. Вучиз лагьайтIа, и шиирар кабинетда ацукьна ваъ, вичин уьмуьрдин гьар герен, гьар са югъ хайи элдин арада физвай, и иер тIебиат авай хайи чилин иервиликай даим тIем къачузвай са шаирдин гуьгьуьлдин кьакьан гьиссер, гьейранвилер я.
Ктабда гьатнавай чи сейли композитор Асеф Мегьманаз талукьнавай «Ракьун рикI» поэма, шиирдал кхьенвай «Экв» драмани кIелдайбуру ашкъидалди кьабулдайдан чIалахъ я зун!

Р.Гьажимурадова