Мирзебегов Азиз Абдулмиран хва 1959-йисан 10-ноябрдиз Азербайжан республикадин КцІар райондин Агъа Лакаррин хуьре дидедиз хьана.
1988-йисуз ам ДГУ-дин филологиядин факультетдиз акьалтарна.
1991-йисуз ам КцІар райондин халкьдин депутатрин Советдин депутатвилиз хкягънай.
1998-йисалай Дербент шегьерда авай «Юждаг» институтда муаллимвиле, 2004-йисалай гьа институтдин педагогикадин факультетдин деканвиле, 2009-2010-йисариз «Юждаг институтдин ректорвилин къуллугъдал кIвалахна.
А.Мирзебегов шиирар кхьиз мектебда авай йисарилай эгечІнай. 1980-йисалай ада КцІар шегьерда, машгьур шаир Лезги Нямета регьбер­- вал­завай «РикІин гаф» тІвар алай эдебиятдин кІватІалда иштиракна. Гьа йисалайни адан эсерар газетрин ва журналрин чинриз акъатиз гатІунна. Сад лагьай ктаб 1993-йисуз чапдай акъатна.
1989-йисуз ада Магьачкъалада жегьил литераторрин ХV республикадин совещаниедин кІвалахда иштиракна ва ам премиядиз лайих акуна.
1991-1996-йисара А. Мирзебегова муаллимвиле кІвалахиз, гьа са вахтунда лезги чІалал сифте яз, аслу тушир эдебиятдин газет – «РикІин гаф» акъудна. 1992-йисуз ада гьакІни «Лезгияр» газетдиз редакторвал авуна.

Университетда кІелзавай йисарилай А. Мирзебегов илимдин кІвалахрални машгъул хьанай. Адан илимдин макъалаяр «Дуствал» альманахда, «Литературадин Дагъустан», «Самур», «Возрождение» журналра, «Юждаг» институтдин илимдин эсеррин кІватІалра ва маса чапдин органра акъатнава.
А. Мирзебегов лезги ва урус чІаларал акъатнавай къанни пуд ктабдин автор я: «ЦІийи Чапаев» (сатирадин шиирар, 1993), «Алкьвадар Гьасанан шииратдин ирс» (1995), «Театрдин шаир» (1997), «Урус шииратдин хазинадай» (1999), «Жавагьиррин таж» (1999), «Сегьнедин суьгьуьрчи» (2001), «Лезги эдебиятдин хазинадай» (2004) ва масабур.
1997-йисалай А. Мирзебегов Урусатдин Журналистрин кIватIалдин ва 2001-йисалай Урусатдин Писателрин кIватIалдин член я.
2005-йисан декабрдиз адаз, тагьсилдин рекьяй лайихвилериз ва яргъал йисарин гьакъисагъ зегьметдиз килигна, Дагъустандин Гьукуматдин Советдин къарардалди «Дагъустан Республикадин лайих муаллим» гьуьрметдин тIвар гана.
2012-йисуз А.Мирзебегова филологиядин рекьяй кандидатвилин диссертация агалкьунралди хвена.
2014-йисуз ам лезги халкьдин Шарвилидин тІварунихъ галай милли премиядиз лайих акуна.
Алай вахтунда Азиз Мирзебегова Дербент шегьердин 13-нумрадин мектебда илимдинни методикадин рекьяй директордин заместителвилин къуллугъдал кІвалахзава.
И мукьвара 55 яш тамам хьанвай
Азиз муаллим “АЛАМ”дин коллективди барка ийизва, ЧІехи Гъуцаривай чандин сагъвал ва рикІе авай вири мурадар кьилиз акъатун тІалабзава!