Сифте гаф
Гьар са халкьдин эдебдин кIвенкIве вичин чIалан сагьибар ава. Вилик фин патал эдеби межлисрин роль иллаки пара я.
1959-йисуз КцIара а девирдин гьар са четинвилиз рум гана, Забит Ризванов, Лезги Нямет, Ядуллагь Шейдаев, Иззет Шерифов хьтин кьегьал ксар кьиле аваз, “РикIин гаф” тIвар алай эдебиятдин кIватIал арадиз гъанай. Ам эдеби мектебдиз элкъведай кьван чIехи хьанай. А мектеб акур, сифте камар кIватIалда вегьей а девирдин са шумуд жегьилди чи эдебиятда, журналистикада чпин чIехи гаф лагьана. Вуч хъсан тир, кIватIал амукьнайтIа.
Са шумуд йисуз кьиле фейи межлис чкIанай. Амма кхьизвайбур чаз амазма. Абур санал акун зи рикIин чIехи мурад тир. Бакуда акъатзавай чи культурадин “Алам” тIвар алай журналди, вичин асул камарикай сад яз, журналдин са хел хьиз, “МАРВАР” тIвар алай эдебиятдин цIийи кIватIал кардик кухтуна. Марвар Миграгъани Муьшкуьрда булахдин, гьакIни цуькведин тIвар я. Икьван гагьда Бакуда, КцIара, Хачмаза, Ахцегьа чи межлисар пара иер гьалара кьиле фена. Вучиз лагьайтIа, ам чи руьгьдин тIалабун я. Адан экуьнал КцIара, Хачмаза, Кьвепеледа, Сумгаитда, Бакуда уьмуьрзавай къелемэгьлияр кIватI жезва. Чна чи, гьакIни классикрин эсерар кIелзава. Са-садан кхьинрихъ галаз таниш жезва, критика ийизва, гьарда вичин фикирар лугьузва. Хъсан чешнеяр “АЛАМ”-диз акъудзава.
Хвеши жедай кар я, чав эдебиятдал рикI алай жегьиларни агатзава. Дагъустанда, Азербайжанда уьмуьрзавай жегьилрин са шумудан шиирар сифте яз “Вар ахъая жегьилриз” рубрикадик кваз журналдиз акъудна. Играми литературадал рикI алайбур, “Марвардин” вар, рикI виридаз ахъа я. Адан уьмуьр яргъиди, камар уьтквембур, хилер бегьер гъидайбур хьурай.Ам булах хьиз михьи, цуьк хьиз иерди хьурай. Чи цуьрцерикай пунар чилин ирид къатара, кукIушар аршда авай кьакьан тарар жедайдахъ, бегьерри дуьньядин поэзиядани гьелелиг лугьуз тахьанвай гаф лугьудайдахъ, гьич тахьайтIа, вичин хъендик ял ядайди жедайдахъ зун чIалахъ я.

Гьуьрметдалди Гуьлалийрин Эйваз, шаир-муаллим, “МАРВАР” кIватIалдин регьбер
Лезги газет