Бакуда «Аламдин» редакцияда «Марвар» литературадин кIватIалдин нубатдин межлис кIватI хьана. «Марвардин» кьил шаир Эйваза литератур межлис ахъайна, кIватI хьанвайбуруз «Куьн атурай, рагъ атурай», лагьана, алукьнавай цIийи йис мубаракна. Гуьгъуьнай ада кIватIалдиз сифте яз КцIарин Ясаб хуьряй атанавай ингилис чIалан муаллим Гуьнеш Мевлановни Бакуда уьмуьрзавай муаллим-филолог Рапия Къарибова межлисдиз танишарна. Алай йисуз межлисдин вилик галай крарикай, гьавадин чIурувиляй агакь тавур юлдашрикай ихтилатна. Абрун саламар межлисдив агакьарна.

«Марварин» кIватIалдал Гуьнеш Мевланова, Абир ЭчIехвиди, Билал Адилова, Бести Нифтиевади, Эйваз Гуьлалийри, Рапия Къарибовади чпин цIийи эсерар кIелна, атанвайбуру чпин фикирар лагьана. КIватIалда Магьира Шириновади Эйваз муаллимдин чIалариз теснифнавай мани сифте яз тамамарна. Межлисдин кьведлагьай паюна зари Эйвазан «Экв», Ж. Ахмедовани Ю. Халилова туькIуьрнавай «Лезги чIаланни Азербайжан чIалан гафалаг», гьакIни Билал Адилован Болгарияда чапуниз гьазурнавай цIийи улубрикай рахунар фена. Гафунин, шиирдин ким тир межлисда чи классикрин, гьакIни межлисда авачир жегьил шаиррин эсерар кIелна.
Февралдин 7-даз “Марвар” литератур кIватIалдин 20-лагьай межлис кьиле фена. Юбилейдин мярекатда Москвадай атанвай мугьман манидар-композитор Терлан Шейдаева ва Рауф КIурвидини иштиракна.
“Марварин” межлисар гьамиша хьиз иер гьалара кьиле фена.

“АЛАМ”