Зун чIехи хьайи, чирвилер къачур Советрин гьукумат чкIана, зун адан пис-хъсан патарикай рахазвач. «Миллет- капитализмдин бегьер я», хьтин лозунг авай а девирдилай тафават яз къе чи Республикада лезги чIалал журналар, газетар акъат­зава. Чи зарийри хайи чIалал ктабар акъудзава, «Алам» журналдин къене «МАРВАР» литература межлис кардихъ гала. Алатай йисуз Бакуда чи играми шаир Билал Адилован «43» тIвар алай ктаб кьве чIалалди чапдай акъатнава. И мукьвара Москвада акъатзавай «Общая писательская газетадини» «43» тIвар алай улубдакай малумат гана. Макъаладин тIвар «Дагъдин гарун нефес хьиз» я.
Халкьдин шаир Байрам Салимовакай цитат гъанвай газетди чи ватанэгьлидин улубдиз хъсан къимет ганва. Алатай йисуз Урусатдин Кхьирагрин КIватIалдин орган тир и газетди заридин шиирарни чапна, гьакIни Билал канибуруз ва чи поэзиядал рикI алайбуруз муштулухни гана. Урусатдин Кхьирагрин КIватIалди зари, публицист Билал Адилов «43» тIвар алай ктабдиз килигна М. Ю. Лермантован тIварунихъ галай диплом ва медалдиз лайих акунва. И премия, чи поэзияда Билалан хуьруьнви Дагъустандин Халкьдин шаир Байрам Селимовазни несиб хьанай. 

За чи журналдин кIелдайбурухъ галаз и хвешивал пайзава, ктабдин автордиз мадни чIехи агалкьунар мурадзава.
Билалан поэзия кIелна, иливариз хьайи кIелзавайди бахтавар кас я. И гьиссерин кIунчIунихъ галаз Интернетдин сайтарай таниш хьайи болгарви зари Дафинка Станевади адан са кьадар эсерар вичин хайи чIалаз элкъуьрна. «Заз Билалан шииррай Шагьдагъ, чи Родопар кьван пара кан хьана «, — кхьизва Д. Станевади са блогда. Заз малум хьайивал и мукьвара «Болгарски писател» издателстводи Б. Адилован шииррин ктаб чап авун пландик кутунвалда. Им лап гуьгьуьлриз чим акъуддай хъсан хабар я. Эхь, ватанэгьлидин, къелемдин, руьгьдин, рикIин дустинин, чи «МАРВАРвидин» агалкьунрив хвеши тахьун мумкин туш.
Ваз и тIвар, и медал мубарак я, мадни чIехи агалкьунар хьурай!

P.S. «АЛАМ» лезги културадин журналдин коллективдини вичин меслят, веревирд ва публицист кхьинралди журналдиз куьмекзавай, адан пакаман мад экуьз акваз канзавай Билал муаллим барка ийизва ва адаз чандин сагъвал, рикIин шадвал ва агалкьунар тIалабзава!

ЭЙВАЗ