КЬВЕДНИ КЬИЙ 
ТIветIре кIвалер кьацIурда, 
ВетIре япар «ацIурда»… 
Гьавиляй за лугьузва: 
-ТIветIни кьий, 
ВетIни кьий! 
РикIиз дакан 
Кьведни кьий! 

 В.Муьшкуьрви 

ЧИЛИН КIВАЛЕР

Дуьнядал зун атай кIвал,зун дидеди хайи кIвал,
«Диде», «диде»гьарайиз, капу-капу фейи кIвал.
Сифте-сифте бахади гьа ина заз кинернай,
Сифте камар за ина кичIез-кичIез вегьенай.
Заз ина мах ахъайнай кьил жив хьтин бадеди,
Сифте яз за кхьенай жуван шиир рикIяй тир.
Гьа ина за кьатIанай жуван дустни-душманни.
Гьа ина заз чир хьанай хайи чил тир Ватанни.
КьатIанай за гьа ина къени -чIуру уьмуьрдин,
КьатIанай за гьа ина уькIуь-цуру уьмуьрдин.
Дуьнядал зун атай кIвал-зун дидеди хайи кIвал,
Ватан патал женг чIугваз, зи кьил рехи хьайи кIвал.

К. Келентерли

ГЪЕТЕР АКУНА
(Куьруь мах)

Хьана хьанач кьван Дуьня тIвар алай са диде. Идаз Йугъни Йиф тIвар алай кьве велед авай. Абур са-садахъ галаз са чIавузни рекье фидачир, къакъатдай. Гьавиляй абур Дуьня дидеди гьар санихъ акъудна, чара авуна, хъиле гьатайла. Ада веледриз вичин къвалав къведай чIав тайинарна. Дидедал кьил чIугвадайла, Йифе вичив гвай чIулав перде цавун чин тирвал акайдай, алем зулуматдиз элкъуьрдай. А чIавуз инсанрин рикIера кучIун гьатдай.
Йугъ и кардал эсиллагь рази тушир. Ва са сеферда ада чинеба яз Йиф стхадин пердедай тIеквер акъудна. Гьа чIавалай инсанриз йифен береда гъетер акуна, абурухъ хвешивал акатна.
Гъетер-Йугъ руша цавун чинай акъуднавай тIекверай авахьзавай эквер тир!

Кхьейди Р. Гьажимурадова я.

БУБАЙРИН ГАФАР

*Акьул бармакда ваъ, кьиле теда.
*Фагьум гвачир аслан фад фура гьатда.
*Акьул гвайдакай зарар галукьдач.
*КIелайдан вилер экуь(ахъа)жеда.
*Гзаф чир хьайила, къуват пара жеда.
*Арифдиз са чIар кун бес я.

КЪАЛ

Хтана руш- цIай, ялав,
Вичин бадедин къвалав:

-Буба ава Шагьназаз,
Вучиз авач буба заз?

-Чан руш, фенва рагьметдиз
Ви чIехи буба Шайда.

-Бес дидеди Акифаз
Вучиз лугьузва буба?

-Чан руш, и Акиф буба
Ви дидедин буба я.

Руш къарагъна чкадлай
Къван акьурди хьиз кьиле:

-Бес Акиф бубадин руш
Вучиз ава чи кIвале…?

Зерифа