САЛМАНАН МУРАД “АХМАТДА” КЪУГЪУН Я!    

КцIарин футболдин тIвар виниз хкажай, чара-чара йисара чак такабурдин гьиссер кутур цIудралди футболистрин тIварар кьаз жеда. Вири гьисаб тавуртIани, уьлкведин цIинин чемпион “Нефтчидин” форвард, гьакIни бомбардир, “Йисан футболист” хкягънавай цIалагурви Намик Алескерован агалкьунрикай лугьун бес я. Адан гьакъинда чна “Qusar КцIар” газетдин июндин нумрада гегьенш макъала чапнавай.

Ингье, спортдин и жуьреда уьлкведин часпаррилайни къерехда тIвар-ван акъуднавай са футболистдикай-Салман Атлухановакай ихтилатиз кканзава чаз.

Салман Атлуханов 1994-йисан октябрдин12-даз Лакаррин хуьре дидедиз хьана. Агакьнавай гада 7-8 километрдин яргъаллай КцIариз звериз-звериз фидай. Экуьнахъ фад къарагъиз, сифтедай 2-3 километрдин, ахпа 5 километрдин мензил атIудай гъвечIи Салмана. 

Бубадин вил алаз гъвечIи чIавалай зиринг уьмуьр кьиле тухвай, къе пешекар футболист хьанвай Салмана вичин сифтегьан-тренер буба Камран Атлуханов яз гьисабзава. Хуьруьн мектебда ада лап хъсан къиметралди кIелна. Амма Агъа Лакардал футбол къугъвадай, алакьунарни викIегьвал къалурдай, мадни вилик фидай шартIар авачир. 

Салман сифтедай райондин “Шагьдагъ” клубдин гъвечIи футболистрикай ибарат командадик экечIна. Гададин зирингвал, зверунин йигинвал акурла, буба Камрана, велед футболдал рикIивай машгъулардайвал хьана. Камран Атлуханов Бакудиз куьч хьана, ана кIвал кирида кьуна, эцигунрин рекье устIар яз зегьмет чIугваз гатIумна. Са йис арадай фейила, бубади футболдал кьару Салманни Бакудиз хкана ва ина ам “Гележегдин гъед” тIвар алай акьалтзавай футболистрин командадик кутуна.

Футбол къугъунилай гъейри, Салман Бакуда юкьван мектебдизни фена, кIелун давамарна. 2013-2014-йисара-Азербайжандин премьер-лигада “Локомотив” ФК-да къугъвана, 2014-2016-йисара-“Баку” ФК-да.

2016-йисуз Туьркиядиз фейи Салмана, ина футболдал машгъул хьун давамарна. 2016-2017-йисара БАЛ (гьевескаррин) лигадин футболдин “Кушадасыспор”, 2017-2018-йисара-“Мерзифонспор”, 2018-2019-йисара “Сакарияспор” 2019-2020-йисара “Ешиловаспор” клубрихъ галаз икьрарар кутIунна, къугъвана. Салман къугъвай вад клубдикай пуд клуб чемпионвилин дережадиз акъатна. Эхиримжи сезонда (2020-2021) 24 къугъуна ада акси командадин варариз 6 туп яна. Им, майданда хуьзвайдан (эрчIи, гьакIни чапла патан) чка кьунвай футболист паталди зурба нетижа я.

Исятда жаван футболдин пешекар Ватандиз хтанва. Туьркиядин Футболдин Федерациядин къарардалди Азербайжандиз ракъурнавай Салман Атлуханова алай береда и уьлкведин суперлигадин клубри Бакуда тешкилнавай “Каракуьмруьк футболдин мектебда” координаторвал кьиле тухузва. Бес им вуч мектеб я?

-Мектебдиз 5-12 яшарин алакьунар авай гада аялар кьабулзава-лугьузва Салмана-Абурухъ галаз са шумуд тренерди тарсар, мешкъер тухузва. Йиса садра Анталяда тешкил жезвай кIватIалра перспектив авай жаванар хкягъна абур Европадин чара-чара клубрин академийриз ракъурзава.

Хкведалди Туьркиядин “Fk 1864 Spor” футболдин клубда туп чукурай Салмана пешекар футболдин карьерани рикIелай ракъурзавач.

-Азербайжандин футболдин сад лагьай дивизиондин са шумуд клубдай теклифар къачунва за,-ихтилатзава Салмана- Гьеле са икьрардал атанвач. Анжах Грозндин “Ахмат” клубда къугьван зи рикIивай жедай. А клубдин стил заз хуш тир хьиз, “Ахматдин” футболистрин къугъунин дережани заз кутугайди я.

Гьинва куьн, чи карчияр, спортдин тешкилатчияр, милли тешкилатрин, жемиятрин кьиле авайбур? Чавай Салманаз адан и мурад кьилиз акъудунин рекье гъил кьаз жедачни? Клубдин регьберри кцIарви гададин къугъуниз килигна алакьунрал къимет эцигун паталди “Ахматдин” кIватIалриз (сборриз) теклиф къачун, эверун туькIуьрдай алакъачияр аватIа чахъ?! Эхир жаванвал эбеди, иллаки футболист паталди са акьванни яргъиди туш!

И меселада куьмек къалурун тек Салманан мурад кьилиз акъудуник ваъ, са лезги жаванди хайи халкьдин тIвар цавузун патал ийизвай алахъунрик къуьн кутун лагьай чIал я.

Видади Севзиханов

Республикадин лайих журналист