Бакуда алай йисан 1-мартдиз «УЬФУЬКЬ-S» чIаларин проекдин дараматда нубатдин «МАРВАР» кIватI хьана. Иер са шиирдин межлис кьиле фена. И межлис кьве кардалди тафават жезвай.
Садлагьайди
«МАРВАРдин» са йис тир. Чи гьар садан мурад тир и кIватIал «АЛАМ» журналдин къене са хел хьиз кардихъ акатнавай литературадин межлис я. Ина чна гьакIни классикрин эсерар кIелда, анализда, фикирар лугьуда. ЧIалакай, поэзиядикай, литературадин къайдайрикай веревирдер ийида. Чна чи рикI ичIи ийида, чи гафари хъсан кьада, чун са коллектив, са хизан я.
«МАРВАР» шиирдин, поэзиядин, литературадин ким, чи руьгьдин тIалаб я. Икьван гагьда чи кIватIалдин цIуд межлис кьиле фена. ЯхцIурни вад кас межлисриз атана.
Дагъустандин халкьдин артист, чи сейли компазитор М.Гуьсейнов, профессор, чи халкьдин дамах Я.Яралиев, машгьур чIугвар, публицист Д.Велибегов, Урусатдин Думадин кIвалахдар Ш.Санаев чаз мугьман хьана.
Чи кIваталдикай чи сифте мектеб тир «Qusar-КцIар» газетди, «Лезги газетди», «Алам» журналди, интернетин лезги сайтари, группайри малуматар гана. Пара кьван чан сагъ хьурай чпин. Межлисар са шумуд чкада- «Алам»дин редакцияда, «УЬФУЬКЬ»дин дараматда, «КцIар» газетдин редакцияда, Урусатдин «Содружество» култура чирдай меркезда кьиле фена. КIватIалди «ВАР АХЪАЯ ЖЕГЬИЛРИЗ» рубрикадивди «Алам» журналда жегьилрин шиирар гана. Чи сейли шаир Билал Адилован шиирар Болгариядин ва Москвадин прессадиз акъатна. Чи рехи «МАРВАРви» Вакъиф Муьшкуьрвиди «Лезги поэзиядин анталогия» тIвар алай улуб кьве чIалалди басма авуна.
Чав са шумуд сейлида чпин мурадар агакьарна. Цавар рази хьурай чпелай!
Асеф Мегьман:
Я рухваяр зун квел чIалахъ я, квелай Аллагь рази хьурай, заз хвеши авур.
Мегьамед Гьуьсейнов:
«МАРВАР» за фикирзавайдалайни иер межлис я. Куь чан сагъ хьурай.
Фейруз Беделахтул:
«МАРВАР» чи халкь патал «Аламдилайни» чIехи вакъиа я.
Я. Яралиев:
«МАРВАРни» «Алам» хьиз чун патал цIийи я, чи чIалан верцIивал ава и межлисда. Гъуцар куьмек хьурай квез.
Дарвин Велибегов:
Аллагь квачиз чIехи сенят жезвайди туш. Изотерик улубар кIела, чирвилер артухар ая, хъсан агалкьунар жедайвал, «МАРВАР»дин къадир хьухь, адаз уьмуьр це, чи лезги чIугварризни ихьтин са кIватIал хьанайтIа вуч хъсан тир.
Чи имтагьан
25- октябрдиз Пакуда Решид Бейбутован тIваринихъ галай манидин театрда «Лезги манидинни шиирдин няни» кьиле фена. «Алам» журналдин шах камарикай сад тир и межлисда чи шаирри халкьдин вилик, чIехи сегьнеда шиирар кIелна. Имтагьан гана.
Кьведлагьайди,
виридаз хвеши жедай мад са кар хьана. «Алам» журналди литературадин конкурсдин нетижаяр малумарна. Конкурсдин гъалиб хьайи Римма Гьажимурадовадиз журналдин дипломни, премия гана.
«АЛАМ» журналдин Лезги Няметан тIваринихъ галай литературадин конкурсдин гъалиб, виридалай хъсан чIалакай шиир кхьенвай шиирдин автор чи играми РИММА СЕЙЛИ (ГЬАЖИМУРАДОВА) вири «МАРВАРвийрин» тIварцелай барка ийизва. Чан чи виридаз СЕЙЛИ вах, КВЕЗ мадни чIехи агалкьунар хьурай. Куьн кьиляй-кьилиз шиир я, поэзия я, рикI я, РУЬГЬ я. Заз виридалай хуш кьве шаирдикай сад КУЬН я. Квез и премия гьалал я, лайих я. Куьн чи дамах я. Мадни чIехи агалкьунар хьурай Квез!
Римма вах, ваз мубарак я къачур диплом чи «АЛАМДАЙ»
Зи гъезелни кьабул ая, михьи рикIин са саламдай.
Агъзур улуб ахъайна за, ви цIарарин дад ганач заз,
Къадра кIелна за и шиир, экв атана ви каламдай.
И чIаларин верцIивили, рехъ ахъайна мичIерай заз,
ЦIар элкъурна дуьнядилай тIвек акъатна зи шаламдай.
Гафунин ким рам ийизвай ви байихрин чIехи я сир,
КьатIунринни кIеле кьакьан, кьил акъатнач и уламдай.
Шаир Эйваз гьейран хьана и фагьумдал, мад сеферда
Кьабулна вун пак сенятдин, эвез тежер гьахъ кирамдай.
Эйваз Гуьлалийрин
зари,
«МАРВАР» литературадин кIватIалдин кьил